Aizawl : Zirtawpni kalta khan Ephatha Special school, Kulikawn West-ah ri hriatnaa harsatna nei te pual -World Day of The Deaf- hman a ni a, bialtu Councillor Baryl Vanneihsangi’n a hmanpui.
Baryl Vanneihsangi chuan mi danglam bik leh vanduaina tawk nia inngai ten him leh zahawm nia an inhriatna hmun, nuam ti leh thalamuang taka an awm theihna boruak tha siam turin mi zawng zawng team khata awma hmalak a tul thu a sawi.
Ri hriatnaa harsatna chu mitin chunga thleng thei reng a nih thu sawiin, “enkawl leh ngaihsak kan duh ang chiahin ri hriatnaa harsatna nei te chungah zahngaihna leh hmangaihna kan lantir tur a ni,” a ti.
Bialtu Councillor chuan, “Lalpa vohbik te hi an nihna anga kan pawma, an theihnate kan ngaihlut chuan inrintawkna pein an thlen theih sâng ber thleng turin phur takin ke an pen anga, an harsatna ang tuartute tan sulhnu entawntlak an hnutchhiah thei ang” tiin, hmangaih leh dawhtheihna nen enkawla, tuamhlawm zel turin Mizo mipui a ngen bawk.