Aizawl : Lunglei district-a World bank kawng km 100 – 160 Kanghmun – Lunglei kawng thawmthat hnathawktu Bhavya construction te hnathawh chungchangah nimin khan Lunglei Bawrhsap Kulothungan-a’n thuthar thehdarhtute kawm a, he huna tel Bhavya construction aiawh Project Manager Horendra Kumar Barua-a’n he kawng hi kumin October thla ral hma ngeia a thawmthat hna an zawh fel tur thu a sawi.
Lunglei Bawrhsap chuan Lunglei district-a World bank kawng thawmthat hnathawktu Bhavya construction-in an thawh tawh chu a chhiat em avangin sor- karin dan tlawhchhanin Bhavya construction chu Lunglei Bawrhsap hmaa inlan turin a ko tih a sawi a. Mipui, lirthei neitu leh district thuneitute lungawina khawpa kawng siam tha tur leh hun tiam chhunga kawng thawmthat hna an zawh fel a tul thu a sawi. Hun tiam chhunga an zawh loh chuan Mizoram state chhunga hnathawk thei tawh lo tura black list an nih theih tur thu a sawi bawk.
Bhavya construction aiawh chuan kawng an thawmthat chu fur ruahtui avangin a chhe nasa hle nia sawiin, kawng chhe thawmthat leh hna chu team pathuma inthlena an thawh leh mek thu a sawi a. Kawng thawmthat hna an thawh leh mek chu kumin October thla ral hmaa zawh hman ngei an intiam thu a sawi a ni.