Congress party president inthlan tur chuh tuma insangphek mek, Rajasthan Chief Minister Ashok Gehlot-a chuan an state-a an sorkarna a chawk buai mek a. A lamtang MLA 90 chuangin president a niha a aiawha chief minister tura Sachin Pilot-a ruat a nih ai chuan bânah an vau mek.
Congress chief chuh tuma a inbuatsaih laia a kaihhruaina hnuai ni ngeia helna awm hian a nih tum a nihtir thei lo mai ang tih hlauhthawnna pawh a awm mek a. Helna chhuakah hian a inrawlh lo niin a insawi tawh a; mahse, Gandhi chhungkua chuan mak an tiin Congress a suasam dan chu mak an ti hle.
Gehlot-a hian Jaipur-a Pathiannia Congress Legislature Party thutkhawma tel, central observer Mallikarjun Kharge hnenah a hote helnaah ngaihdam a dil nia sawi a ni a. CLP thut dawn laia thutkhawm dang koh a ni leh helna chhuak chu ‘tih sual palh’ niin Gehlot-a hian a sawi a, engmah inrawlhna a nei lo niin a sawi bawk.
Inrawlh lo nia a insawina hi Kharge-a hian a pawmsak vak lo nia sawi a awm lehzel a, Gehlot-a thu hmu hmasa lo chuan amah thlawptute hi hetianga an chet mai a ring lo.
Gehlot-ah hian October 17-a Congress president thlan turah Thawhlehni hian a hming a pe lut dawn nia sawi a ni a. Rajasthan-a buaina lian tak a awm mek lai hian inthlan chuh ve tur tho nia sawi, Kamal Nath chuan Thawhtanni khan Delhi thlengin Sonia Gandhi a hmu a. Rajasthan buainaah hian palai hna a thawk zui dawn nia sawi a ni bawk.
Pathianniah khan Gehlot-a lamtang MLA thahnem tak chuan president atana thlan a niha a aiawha chief minister atana Pilot-a dah a nih chuan a ruala bân vekah an vau a. Zan lamah CLP thutkhawmah pawh tel duh lovin Ajay Maken leh Kharge-a ten inkawm an duh pawh an kawm duh lo.
Maken-a leh Kharge-a hi Delhi.panin an haw leh tawh a, Gehlot-a thurualpuiten central hruaitu an lo dawnsawn dan chu an lawm vak lo.
Maken-a chuan tuna chief minister thar tura lo buai lovin Congress president thlan huna tihfel chi zawk a nih thu a sawi a, “Ashok Gehlot-a hi party chief han ni phawt sela thil tihfel zawk tur a ni a, thuneihna a neih tawh chuan Rajasthan-a amah thlaktu tur pawh a thuneihna a ni tawh zawk ang,” a ti.
Maken-a chuan an lo dawnsawn dan chu ‘inthununna awm lo’ tiin a sawi a. Central-a hruaitute pawhin mak an tiin zahthlak an ti niin a sawi.
Gandhi chhungkua chuan party-a chanvo lian an kalsan hret hret mek a. Party chhunga mi thenkhat chuan Gehlot-a rilru put hmang an chiang tawk lo va, Rajasthan-a thuneihna inthlak dan pawh a mumal lo hle niin an ngai.
Gehlot-a hian Rajasthan-a a chanvo chu party chief a nih hnuah pawh kalsan a tum lo nia ngaihna a awm mek a, Gandhi chhungkaw hnenah pawh chief minister hna chu kalsan a tum lo niin a sawi tawh nia sawi a ni a; mahse, Rahul Gandhi chuan vantlang zingah mi pakhatin chanvo pahnih chelh chu an kalphung a ni lo tih a lo sawi tawh thung.
A hma atanga party chhunga a elpui ngar ngar, Pilot-a hnenah chanvo lian pek chu a hreh hle nia ngaihna a awm bawk a. Pathiannia MLA-te helnaah inrawlh ve miah lo angin insawi mah se Congress MLA rual hian a thu hmu lovin hetiang thil lian tham an tih ring lotu an tam zawk.
Pilot-a hi kum 2020 khan a lo hel chiam tawh bawk a, Gehlot-a sorkar chu MLA 20 zet hruaia a helsan avangin a nghing hman hle a ni.