MNF president Zoramthanga, chief minister chuan nimin khan MNF office, Hnam Rûnah thu sawiin sorkarin health care atana sum puk a tum chungchangah mipui bum tuma thu chhumbung sawi an awm thin tih a sawi.
MNF party-in nimin chhung inkhawm an neih, an party treasurer, K Vanlalauva kaihhruaiah hian Zorama chuan health care atana Asian Development Bank (ADB) atanga vaibelchhe 1,000 an puk turah vaibelchhe 720 chu central rulh tur a ni a, Mizoram sorkarin a rulh ve tur chu zaa 28 chauh a nih thu a sawi.
Health care atana sum puk chungchangah hian mipui bum tuma thu chhumbung sawi chhuak an awm thin thu a sawi a, “Keima tawngkam ngei hawhin ‘bang chhak sathlaka bang thlang bel ang a ni,’ tiin an sawi a; mahse, an sawi dan hi a chhumbung a, in sak that nan mau lian pui pui kan pu thleng thar dawn zawk a ni,” a ti.
MNF president chuan tun hnaia sorkar laipui hotu lawkte dawra Delhi a zin report pe bawkin, kar hnih dawn a cham chhungin president, prime minister leh union minister dangte a kawm thu leh heng mi pawimawh tak tak a hmuhte hi Mizoram tana hmasawnna tur kawng hrang hrang a sawipui a, chhanna lawmawm tak a dawn thu a sawi.
Sorkar laipui hotu lawkte a kawmnaah hian Myanmar buaina chungchang an ngaihven thu leh Myanmar buaina a tawp theih nan India a inrawlh ngei a tul thu a thlen tih a sawi bakah Assam chief minister nen an inkawmnaah dan loa kuhva sumdawnna kalpui chu theihtawpa do tur leh lo neitute thar chhuah kuhvate chu tha taka hralh a nih theih nan theihtawpa hmalaknate an sawi dun thu a sawi bawk a ni.