Indian pa, lottery-a cheng tam tak mantu chu a thil man avangin lawm viau mah se buainain a nang zui mek a, sum khawih dan a thiam loh avangin puitu tur a dap mek.
Kerala-a auto driver, Anoop-a hian Rs. maktaduai 250 zet man September thla tir khan an state government lottery-ah a man.
Chawlhkar khat a liam leh hnuah erawh video siamin a sum ngah lutuk chuan amah leh an chhungkua a tibuai mek tih a sawi.
“Ka man kha ka man ring lo va, third prize kha a tha lehzual,” a ti.
Anoop-a hian video-ah hian miin an ngaihven leh bawr buai lutuk avangin an inah pawh awm lovin a chhuak rih a ni.
Ram pumah a chanchin ziah a ni a, an state-a tum khata lottery man tam ber a ni.
September 17 khan a fapa khawlbawm chhu kehin Malaysia-a hna zawng tura a zin chhuah hma chiahin ticket hi a lei a ni.
A man tih puan a nih chiah chuan an chhungkua chu chanchinbumiten an ngaihven zui ta luai luai a ni.
“Ka man tih ka hriat khan ka hlum tak zet a ni,” tiin video-ah hian a sawi a. “Kan ina mi leh thlalakna a awm nghal tuk tuk a ni,” a ti.
Mahse, a hnu lam erawh thunun theih a ni ta lo tih a sawi.
“Pawn pawh ka chhuak thei lo va, khawi mah ka kal thei lo. ka fa a damlo va, doctor hnenah pawh kan hruai thei lo,” a ti.
Anoop-a hian sorkar hnena chhiah a pek fel hnuah Rs. maktaduai 150 a la chang dawn a, tuk tin a inah mi an lut zut zut mai a ni.
“Tunah hian pawisa ka la dawng lo va. Ka harsatna hi tumahin min hriat thiampui lo va, ka sawi zing tawh,” a ti.
Anoop-a hi miin an chim buai lutuk avangin an chhungte dang hnenah an chhungkuain an awm rih.
State sorkar chuan Anoop-a hian a sumte a hman thiama a enkawl thiam theih nan ni khat training an buatsaihsak dawn tih an sawi a ni.