Rajasthan MLA hlun, Chief Minister Gehlot-a lamtang tha tak chuan Pathiannia MLA 92 zetin bân an tumnaah inrawlhna an nei lo niin a sawi.
MLA rualte hi central hruaitu pahnih, Maken leh Kharge hova Pathianni zana CLP thutkhawmah an tel duh lo va, Gehlot-a aia Pilot-a dah chu an pawm dawn lo tih an sawi a. Party thutkhawma tel lovin an zinga pakhat, Gehlot-a minister, Shanti Dhariwal-a inah an awm khawm zawk.
Gehlot-a hi Gandhi chhungkuain Congress president atana an duh thlan ber nia sawi a ni a, hetianga amah thlawptute an hel chu Kharge-a hnenah ngaihdam a dil nia sawi a ni a. State Minister Pratap Singh Kachariyawas pawhin an tel lo tih hi a sawi.
“Gehlot-a hian MLA tumah hel turin a ti lo,” tiin Kachariyawas chuan NDTV a hrilh a. MLA-te hi lungawi lohna lantir tum lovin, Navratri kût avangin an haw darh tawh niin a sawi.
Gehlot ang ang bawkin Kachariyawas-a pawh hian Thawhlehni tuka temple a tlawh chuan helna rilru put a nih lohzia a tilang niin a sawi.
“A hma ni khan Pu Gehlot-a hi Jaisalmer-a Tanot Mata hmun thianghlim a tlawh a. He hmunah hian phone biak theih a ni lo,” tiin MLA hian a sawi a, chief minister hian mi a be thei miah lo niin a sawi.
Gehlot-a hi Jaisalmer panin Kachariyawas leh Govind Singh Dotasra te nen an pan a. “Jaipur kan thlen leh hnuah Gehlot-a hian Maken leh Kharge hmua a ina kal leh turin min ti a. Sstate Minister Shanti Dhariwal hruai turin min ti bawk,” a ti.
MLA-te hi Pathianni zan dar 7:00-ah chief minister-ina thukhawm tura tih an ni.
Hetih lai hi Gehlot-a Jaisalmer atanga a haw thlen hlim niin Congress Chief Whip Mahesh Joshi, Mahendra Chaudhary leh Shanti Dhariwal te chuan MLA rualte chu Dhariwal-a in lama inhmu khawm turin an ko ta daih a ni.
MLA-te hian resolution siamin Gehlot-a aiawh tura Pilot-a’n kum 2020-a a helpui zinga mite chu an pawm dawn lo tih an sawi a. Hel laia Gehlot-a lamtang ngei an duh tih an sawi.