- Upa Lalthara, Kohima (9436001667)
- PENTIKOS NI-A THIL THLENG KHA ‘PIAN THARNA’ NÊN SAWI ZAWM CHI A NI EM?
23.1 Pian tharna vaw lârtu zinga mi thenkhat chuan Pentecost nia Thlarau Thianghlim lo thleng kha Isua zirtirte leh amah ringtute an pian tharna angin an sawi ve mai bawk a. Bible-ah hian Isua ringtu leh zuitu ni tawhte tâna pian thar a la tul cheu thu emaw, an pian thar tak thu emaw hi hmuh tur a awm tlat loh avangin he ‘pian thar theology’ hian Pathian thu behchhan tur a vân khawp mai a; hei vang hian, Pentikos ni-a Thlarau Thianghlim lo thleng kha Isua zirtirte leh a zuitute an pian tharna anga hmehbel an tum ta mai a ni âwm e.
23.2 Mahse, kan sawi tâk ang khân Lal Isua leh Nikodema inbiaknaa Lal Isuan ‘gennao anothen’ a tih kha chu ‘chung lam hrin/ Pathian hrin’ tihna a ni a; hei hi Pentikos ni-a Thlarau Thianghlim tihharna lo thleng nen kha chuan thil hrang daih niin a lang. Khatih hun laia ringtu leh, a hnu deuha ring thar lo ni tate zawng zawng khân, Pentikos ni-a Thlarau Thianghlim tihharhna thlipui ang maia lo thleng leh, a chhinchhiahna danglam leh langsâr tak ang chi te kha chu an chang ve vek chuang lo va; khatiang tak kha chuan Thlarau Thianghlim inlârna pawh a thleng nawn leh tawh lo niin a lang. Thlarau Thianghlimin ringtute a kan thin dân te, a thuam chak thin dân te hi chu chi hrang hrangin, thâwm ri va nei lêm lote pawhin a lo thleng thin ni zâwkin a lang.
23.3 Pentikos nia Thlarau Thianghlim lo thleng kha chu Lal Isuan a zirtirte leh amah ringtute thuam chakna tura a lo tiam lâwk leh a rawn tirh kha a ni a. Khatih laia Isua zuitute dinhmun leh an hmabâk hautakzia en kha chuan khatianga Thlarau Thianghlim tihharhna nasa bîk leh chhinchhiahna mak bîk kha an mamawh ngawih ngawih rêng a ni. Hei hi hriain, Lal Isuan Pa hnên atangin a rawn tîr ta a nih kha.
23.4 Tichuan, Pentikos nia Thlarau Thianghlim rawn thleng kha ‘ring lotute’ an lo pian thar nân emaw, ‘ringtu ni tawh sâte’ an lo pian thar nân emaw pawh ni lovin, ringtu (Pathian hrin) lo ni tawhte thuam chakna tur a ni zâwk a. Ring lotute kha chuan an nuihsan a, uain thar an rui emaw te an ti mai a nih kha!
23.5 A nihna takah chuan, ringtu, Pathian fa lo ni tawh zawng zawngte hian Thlarau Thianghlim tihharhna leh thuam chaknate hi kan mamawh rengin kan dawng thin bawk a; kan dawn dân leh, kan dawn nasat dân erawh a inang lo mai zâwk a ni. Hêng hi chu a petu-in tul a tih ang leh, a dawngtu inpekna azira pêk leh dawn an ni maiin a lang. Hetianga thlarau lam thilpek ringtuten an dawn hi ‘pian tharna’ emaw kan lo ti mai thin a nih chuan kan phuah chawp, Bible thu tlawhchhan tur nei lo a nih hmel khawp mai.
- PETERA KHA A ‘PIAN THAR’ HMAIN VÂNRAM CHÂBI KAWLTUAH ISUAN A RUAT EM NI?
24.1. Simon Petera leh Lal Isua zirtir dangte kha Pentikos ni-a lo piang thar ta angin ‘pian tharna’ vaw lârtu thenkhat chuan an sawi mai thin a. Petera, anni ngaiha la piang thar lo (chhandamna changtu pawh la ni pha lo) kha, Lal Isuan leia a Kohhran innghahna lungpui atân leh, vân ram châbi kawltu-ah a lo thlang fel dêr si kha engtin nge an sawirem tâk ang le!
24.2. Petera kha hetiang dinhmun pawimawh a pêk hmâ chiah khân, Lal Isuan a zirtirte kha zawhna pawimawh tak, “Nangnin tu nge a ni min tih?” tiin a zâwt a. Chu chu Peteran lo chhângin, “Krista, Pathian nung fapa chu i ni,” a ti a. Chutah Lal Isuan, “Simon Bar-Jona, i eng a thâwl e; tisa leh thisenin a hriattir che a ni si lova, ka pa vâna miin a hriattir zâwk che a ni. Tin, nang Petera i ni tih ka hrilh bawk a che; he lungpui chungah hian ka kohhranho ka rem chho vang a, mitthi khaw kulh kawngkhârte chuan chu chu an ngam lo vang. Vânram châbite ka pe ang chia, lei chungah eng pawh i phuar apiang vânah phuar a ni ang a; lei chungah eng pawh i phelh apiang vânah phelh a ni ang,” a ti ta a nih kha (Mt 16:16-20 adt).
25.3. Hetiang taka nihna sâng leh mawhphurhna nasa Lal Isuan Petera chunga a nghah ngamna chhan kha chu Petera kha Pathian hrin (gennao anothen) leh Pathian hnên atanga hriattirna/ mit vârna pawh lo dawng hial tawh a nih vang ni ngeiin a lang. Petera Pathian hrin (gennao anothen) a lo nih hun hi Isuan ‘min zui rawh u’ a tih a, a unau Andria nên an lênte kalsana an zui tâk hun kha a nih a rinawm khawp mai. Anih loh vêk pawhin, Petera hnêna Isuan … ‘tisa leh thisenin a hriattir che a ni si lova, ka pa vâna miin a hriattir zâwk che a ni’ a tih hun hma lam kha chu ni ngeiin a lang. Chuti chung pawhin Petera pawh hi a famkim bîk lova, ringtu dangte ang bawkin Thlarau Thianghlim pâwlna leh tihchakna te a la mamawh zêl dâwn tih chu Lal Isua pawh khân a hre tho bawk a ni. Pentikos ni pawh khân, ringtu dangte ang bawkin Thlarau Thianghlim tihharhna chu a dawng ta ngei bawk a nih kha. (Lal Isua phattu anga Petera kan chhuah mai thin pawh hi thil hriat fuh chiah loh kan neih vang a ni thei em, tih hi a hranpa-in kan la luhchilh leh dawn nia.)
25.4 A tul dan azirin Thlarau Thianghlim hi ringtute hnenah pek nawn a ni fova. Petera leh zirtir dangten khatia Isua thawhleh hnu-a a chanchin an han tlangaupui tan tak tak lai khan, vauna na tak (puithiam lalte leh upate atangin) an dawng a. Hemi avang hian Petera leh zirtir dangte chu Pathian hnenah an tawngtai a. “Chutia an tawngtai zawh chuan an awmkhawmna hmun chu a lo nghing a, an za-in Thlarau Thianghlimin an khat a, huai takin Pathian thu an hril ta a” (Tirh 4:31) tih Bible-ah kan hmu a. Pentecost Ni-a Thlarau Thianghlim an dawn kha Petera leh zirtir dangte an ‘pian tharna’ a nih dawn chuan, hemi tum hi an ‘pian thar’ vawi hnihna kan ti dawn em ni ang le!
(la chhunzawm tur)