Russia lailia sikulah mipa pakhatin silai a hmet puak chiam a, mi 13 vel thiin mi dang 21-in hliam an tuar niin thuneituten an sawi.
Thi zingah hian sikula zirlai naupang pasarih pawh an tel a, Izhevsk khawpuia sikulah hian zirlai 1,000 vel an awm a ni.
Silai hmet puaktu pawh hi a inkap hlum ve nghal a, he sikula lo lut tawh thin a ni.
Russian chanchinbuten video an dah chhuahah chuan sikul chhungah hian mi an chiaiin an phar buai hle tih a lang.
Video thenkhatah chuan classroom chhuata thisen awm te, tukverha silaimu luhna kua leh dawhkan hnuaia zirlaite bungrua let remrumte pawh hmuh theih a ni.
Naupang pasarih leh puitling paruk an thi a, pahnih hi venhim hna thawktu niin zirtirtu pahnih an thi bawk niin Russian thuneitute chuan an sawi a. Thawktu leh zirlaite hi sikul building atang hian sawn chhuah an ni tawh.
Tual chhung MP pakhat chuan silai hmet puaktu hi Artem Kazantsev-a a nih thu leh pistol pahnih a ken thu a sawi.
A chhuitu committee-in online-a video post-ah chuan chhuatah T-shirt var, a hmaa Nazi symbol leh balaclava inziak hain a ruang mut a ni a. A chenna in pawh an dap tawh bawk.
Region hotupa chuan September 29 thleng thite sun an nih tur thu a puang a. Russian President Vladimir Putin-a thupuangtu chuan president hian he thil thleng hi pawi a ti tak zet tih a sawi.
Sikul hi mihring 6,50,000 chenna, Izhevsk khawpui laili, sorkar building pawimawhte awmna bul lawka awm a ni.