ZPM party Consultant PL Liandinga’n chuan, ZPM-in sorkarna chan ngei an inrin thu leh kalphung thara kal a harsat loh thu sawiin, “tuna kan sorkarin a tih tam tak hi ti ve lo ila kalphung thar chu a ni mai” a ti.
Nimina ZPM party chhung inkhawmah he thu hi PL Liandinga chuan a sawi a. “Mipuiin an hlawkpui chuan loh tur – Mau, kawngchhawng, leiverh, nuai 3 sem, board siamchawp enkawl zui loh te bakah thil dang tam tak, mipui pawisa hekna tur tihbo a ni tur te pawh kalphung thar a ni,” a ti.
PL Liandinga chuan, “Kamrul-a leh Pu Zoramchhana tellohna sorkar, restricted tender ringawt hmanga rorellohna sorkar pawh mipui tan hmuh chakawm leh kalphung thar a ni thei a, heng thil hnawksak awmsa tih chhunzawm loh bakah, tunhmaa Mizoram sorkara la awm ngai lo, Chief Minister-in works department lian a chang lo tur te, Val Upa Council uapna hnuaia sorkar a kal tur te, ZPM sorkar chhunga MLA hlawh a pung lo tur chiangsa te, Chief Minister leh Minister te motor kawl tihtlem te pawh kalphung thar nasa tak a ni dawn” a ti.
“Thlai thar leina budget-a a awm tur te, khaw hrang hranga village development council din tur te, MLA/ Minister te mimal car tur sorkar-in a lei tawh lo turte, heng zawng zawng kan tiha, dikna nena ro kan rel chuan Mizoram hi a thawveng sawt ngei ang,” PL Liandinga chuan a ti bawk.
ZPM Consultant PL Liandinga chuan “Kan inbuatsaihna atana pawimawh tak tur chu rinawm tura in Baptist hi a ni a, rinawmna nena kan tih si loh chuan kalphung thar hian awmzia a awm lo thei a ni” a ti a. Kalphung thar chhungphum pawimawh ber tur chu sum ngainat lutuk loh tum phawt a nih thu a sawi bawk.