Mizoram Premier League champion lai Aizawl FC chu round 4-ah Mizoram Police lakah tlawm mahse an tho lehnghal a. Chiang taka hnehna changin 4-0 in Chanmari FC an sawp.
Thawhlehni MPL9 round 5 inkhelah Aizawl FC in vawi hnih champion tawh Chanmari an thunun hneh hle a. First half-ah tun Inter-Village tournament a che tha R. Ramdinthara’n goal hmahruai a khung.
Second half-ah Aizawl FC in Chanmari tlarhnung an thiat fova. R. Lalthanmawia’n goal a khung belh nghal vat hnuah K. Lalrinfela’n team goal tha a hmawr a bawk a. Lalthanmawia bawkin huntawp hma in a goal hnihna a khung.
Inkhel hnuhnung zawkah FC Venghnuai in an chetthat an chhunzawm a. Anni pawh hi round 4 a Chanmari FC hneh tawhtu niin kumin I-Day champion Mizoram Police FC lakah 1-0 in hnehna an chang.
Kumin I-Day semi-final a intum tawh team pahnihte an inthlau lo leh thova. Tun tuma a danglamna erawh second half-ah a thleng.
Venghnuai in mualdinglam atanga ball an vawrh luh atang goal hlauhawm an nei a, mahse Police lamin dan an tumnaah handball avangin penalty an chawi a. Venghnuai tan Lalnunsiama chuan chakna goal ni turin goal-ah a khung.
Round 5 inkhel hi khelmual lama harsatna a awm avangin Rajiv Gandhi Stadium a sawn a ni a. Inkhelh hun sawn hma a ni bawk.
Vawiin chhun dar 12-ah Chhinga Veng FC leh Chawnpui FC an inkhel anga. Tlai dar 3-ah Electric Veng FC leh FC Bethlehem te an inkhel ang.