Congress hruaitu, Sachin Pilot chuan Rajasthan-a an party chhung buai mek karah Delhi a thleng a, party chief Sonia Gandhi hmuh a tum a, an inkawm thei dawn em hriat a la ni lo.
Pilot-a hian Gandhi-i hmuh tumin a pan a; mahse, Thawhlehni chawhnu thleng kha chuan phalsak a la ni lo va. An inkawm thei dawn em tih a la chiang lo.
Tar lan tawh angin Rajasthan-ah hian Chief Minister Ashok Gehlot-a chuan Congress president inthlan tur chuh a tum avangin a nihna a kalsan a tul hmel a, a aiawh tur hian a deputy ni mek, Pilot-a hi sawi rik a ni a; mahse, Gehlot-a lamtang MLA 90 chuang zet chuan nihtir tum lovin helna lian tak an chawk chhuak mek.
Gehlot-a lamtang MLA-te hian Pilot-a chu chief minister atana dah a nih chuan an bân tur thu an sawi tawh a; kum hnih kal taa Pilot-a leh a ho MLA an hel laia sorkar lama tanga Gehlot-a lo thlawp tang tangtute zinga mi ngeiin Gehlot-a ai chu awh zui se an duh.
Pilot-a’n Thawhlehnia Delhi a thlen hnu lawkah hian Congress party sawisatua puh mek, Gehlot-a pawh hian kal vea Gandhi-i hmuh ve a tum nia sawi a ni bawk.
Gandhi-i hian Gehlot-a thlawptuten heti taka party an tibuai hi tha a ti lo nia sawi a ni a, inthlan turah pawh Gehlot-a hian a tawrh phah theih rinna a awm mek a; mahse, president nih hi a la tum zui reng nia sawi a ni.
Kum 2018-a Rajasthan assembly inthlanah khan Pilot-a hi a thawk rimin mi tam tak phei chuan hnehna an chan takah khan chanvo sang ber hi chelh turin an ring hman a; mahse, Rahul Gandhi-a thu rawn angin Gehlot-a thachhangdawltu a ni ta zawk.
Kum 2020 khan Pilot-a hi a hel ta reng a, Delhi-ah amah thlawptu MLA 18 nen inkulhin chanvo lian zawk chan an phut a. Thla khat chuang zet an inkulh hrang a, Priyanka Gandhi Vadra leh Gandhi-a ten an kawm hnuah an kir leh chauh.
Tun tum buaina inmung mekah hian an party hruaitu hlun, Gandhi-a hian Gehlot-a’n party chief a niha chief minister a nih tel chu tha a tih loh thu a lo sawi tawh a, Pilot-a tan chanvo sang chelh theihna hun a inhawnga ngaih a ni a. Mahse, Gehlot-a hoten an pawmpui ta lo va, Pathianni atang khan party chhungah boruak lian tak a awm zui ta mek a ni.
Gehlot-a ai a awh zui dawn em tia an zawh chuan Pilot-a hian party hotu sangten thu an tihtluk mai zawk tur thuin a chhang a ni.