MHIP General Headquarters leh Mizoram State Commission for Protection of Child Rights (MSCPCR) te chuan Aizawl veng pakhata hmeichhe naupang thihna kaihhnawih thubuai chu chak taka chhui turin Aizawl district police hotute an ngen a, pawikhawihtu man turin finfiahna tha tawk hmuh a la ni lo niin police hotuten an sawi.
MHIP hruaitute leh MSCPCR hotute chuan nimin khan hmeichhe naupang thihna kaihhnawiha thubuai awm chungchanga police-te hmalak dan ngaihvenin Aizawl SP pisa-ah an leng a. MHIP President Ngurmawii Sailo chuan hmeichhe naupang kum hnih mi thihna chungchanga police-in thubuai an ziah luh chu chak taka bawhzui ni se an duh thu sawiin, thil tisualtu rang taka man chhuaka a phu tawk hremna pek ngei an duh thu a sawi.
MSCPCR Chairman Dr C Lalsangzuala pawhin pawikhawihna thleng nia ngaih theihah hian thil tisualtu chu man chhuah ngei an duh tih sawiin, MSCPCR-in hnuchhui kawngah theihtawpa police puih an inhuam thu a hrilh.
MHIP leh MSCPCR hruaitute lo dawngsawngtu, Additional SP PC Laltanpuia chuan naupang thihna kaihhnawih thubuai chhui kawngah police-ten theihtawp an chhuah tih sawiin, DGP hova hma an lak thu a sawi a. Pawngsual a nih leh nih loh finfiahna turin swap sample-te lain, report an ngaihchan mek thu a sawi.
He thubuai chhuina kawngah naupang nu leh pa pawh lu an sun lai ni mah se, thu an zawhfiah tawh thu Addl. SP chuan sawiin, “Pawikhawihtu man chhuak turin finfiahna tha tawk kan la hmu lo,” a ti.
Aizawl District Additional SP chuan he thubuai chungchangah hian damdawi in lam fakawm an tih thu a sawi a. “Naupang kha a thih chhan tak chu pawngsual a tawh vang ni lovin natna dang vang a ni, en liam mai theih ni mah se, dan anga hma an la kha an fakawm a ni” a ti.