Hurricane Ian chuan tuipui atangin Cuba khawthlang lamah category three storm-a nain khawmual a kai ta a, darkar khata km 205 zeta chak a keng.
Cuban thuneitute chuan hmun rukah emergency an puang a, khawchin zirtute chuan tuipui kamah tui fawn sang tak awmin tui lian thut leh lei min a hlauhawm bawk tih an sawi.
Mi sang tel an chenna in chhuahsana hmun him dang pan tura tih an ni.
Ian hi insiam chak zelin Florida pawh a thleng dawn a, governor chuan ‘chhiatna nasa tak’ a thleng thei tih a sawi.
India huna Thawhlehni chawhnu dar 2:30 khan storm hi Cuba-a Pinar del Rio khawpui chhim lam km riat vel leka hlaah a awm mek a, darkar khata km 19 vela chakin hmar lam hawiin a kal zel niin US National Hurricane Center (NHC) chuan a sawi.
Ian avang hian Cuba-ah chuan ruah cm 30 zet a sur niin an sawi a. Pinar del Rio province bikah mi 38,000 zet hmun hima suan chhuah an ni tih AFP news agency chuan a tar lang.
Nilaini tukah hurricane hian Florida khawthlang vaukam a thlen rin a ni.
Tuna Florida-a a thawhna tur hmun thenkhat hi chuan hurricane hi kum za chuang zet an lo tuar tawh lo.
Florida Governor Ron DeSantis chuan ‘an state-ah na takin a thawk dawn’ tih a sawi lawk a, mi chengte chu ei tur, tui, damdawi leh tuialhthei inring lawk turin a chah.
“Hurricane liam tham tak a ni dawn,” tiin Thawhtannia thuthar lakhawmtute a kawmnaah a sawi a, mipuite chu chiai phah lo tura a tih rualin inbuatsaih erawh a tul tih a sawi.
Governor hian Florida pumah kartawp khan emergency a lo puang tawh a, National Guard sipai 5,000 zet inralrintir an ni bawk.