Aizawl : Larsap Dr. Haribabu Kambhampati-a’n Bawngkawn South-a awm, thalaite skill development training na hmun Medhavi Foundation Centre chu nimin khan a tlawh a, Deendayal Antyodaya Yojana-National Urban Livelihoods Mission (DAY NULM) hnuaia thalai 24, ei leh in siam zir (Commis Chef) zo te certificate a hlan.
Larsap chuan training hrang hrang an kalpui dan te, training zo ten hna an hmuh dan te, training hmang tangkaia mahnia eizawnna bultan awmte dinhmun te a hriat duh avanga Medhavi Foundation Centre chu tlawh a nih thu a sawi a. Skill development chungchang sawiin, “training chu a tih thei mai a, a pawimawh ber chu training zo ten hna an hmuh emaw, mahni kutkea dinga eizawnna bultanna emaw an neih a ni” tiin, chu chu sorkar laipui scheme Pradhan Mantri Kaushal Vikas Yojana (PMKVY) in a tum ber pawh a nih thu a sawi.
Service sector bikah phaia hotel leh damdawi in-ah te Mizo thalai hnathawk an tam nia a hriat thu sawiin Larsap chuan “heng sector-ah te hian Mizo leh hmarchhak state dang thalaite chhawr nuam an ti a, hna a awm reng a, mahse mahni inlum kalsana hmundanga awm an inhuam a ngai” a ti. Larsap chuan Commis Chef course zo thalaite chu kawmin, an an kal zel dan tur te a zawt bawk.
Sorkar thuchhuahin a tarlan danin Medhavi Foundation hian kum 2019-ah Mizorama skill development zirna leh training tanin, Mizo thalai 800 chuang an training tawh a. Heng zinga tam tak chu Mizoram leh Mizoram pawnah te hna an hmuhsak. Mizorama Pradhan Mantri Kaushal Kendra (PMKK) centre puitling awmchhun a ni.