Aizawl: Mizoram Rural Bank (MRB)-in nimin khan MRB Head office, Aizawl-ah an kum 39 tlin champha an lawm a, Rural Development Minister Lalruatkima’n telpuiin, MRB din chhan bulpui ber pakhat, lo neitute leh thingtlanga kuthnathawka eizawngte dawmkan chu hre reng turin a chah.
Lalruatkima chuan MRB hotute chu ram hmasawnna an kutah a innghat thui hle tih hre chunga an din chhan bulpui ber tihlawhtling zel tura tan la zual turin a chah a. An kum 39 tlin denchhena Durtlanga Special Blind School hnenah Braille typewriter leh Spastic Society tanpuina sum thahnem tak an pe pawh ropui a tih thu a sawi.
RD minister chuan RD Deptt. hnuaia MzSRLM nen MRB chuan self help group chungchanga October 25, 2017-ah thawhhona thu an thlun thu sawiin, business correspondent chungchangah pawh April 30, 2019-ah thawhhona thu an thlun thu a sawi a. Thawhhona thu an thlun atanga tun thlengin self help group 1,420 tan loan Rs vbc. 14 an pe chhuak tawh tih sawiin, bank awm lohna khuate tan banking service an tihsak thu leh self help group tan insurance leh pension scheme an buatsaih thu a sawi a. Sorkar hmalakna hrang hrang dangah pawh MRB chu an tangkai hle tih a sawi bawk.
MRB Chairman V. Jaya Chandra-a’n LR&S minister ni bawk, Lalruatkima hnenah hian district tinah MRB-in anmahni puala office leh staff quarters an neih theihna tura ram an mamawh thu a lo thlen nghal a. Minister chuan a theih anga lo en zui a nih tur thua chhangin MRB tan sorkar a inhawng reng tih a sawi bawk a ni.
MRB chairman hian kumthara kum 40 an tlin lawmna tur ruahmanna kal mekah Mizoram mipuite tan an bank kaltlanga hamthatna leh hmasawnna kawnga hmalakna tur programme hrang hrang an ruahman dawn tih sawiin sorkar leh mipuite thlawpna leh phurpuina a ngen nghal bawk a ni.