36th National Games 2022 khel tur Mizoram Women’s Football Team chuan Thawhlehni khan Lengpui atangin an inkhelhna hmun tur Ahmedabad, Gujarat an pan.
MSSC Sports Complex, Lengpui a ni 34 an inkulh chhungin manager Lallawmsanga, assistant manager Dr. V. Lalbiakpuii, coach F. Lalrozara leh physio Angie Lalramngaihawmi ten Mizoram team hi an kaihruai a, Mizoram Olympics Association hruaitute leh inelna discipline danga Mizoram aiawh turte nen Gujarat an panho.
Mizoram hian an khelh khatnaah October ni 1 hian Goa an hmachhawn anga, hemi hnuin Tamil Nadu leh Manipur te an hmachhawn leh ang.
Manager Lallawmsanga chuan Lengpui a MSSC Sports Complex-ah tha taka training camp an neih thu sawiin, Mizoram sorkar Sports Department, Mizoram Olympics Association leh Mizoram Football Association ten an mamawh ang ang ngaihtuah sak a duat taka an enkawl avangin lawmthu a sawi.
Lengpui camp-ah player 16 awmin midang 4 – phai lam club a khelte leh National Camp a awm mek ten inelna hmunah an rawn zawm belh tur thu a sawi.
Mizoram Women’s team hian kum 2021 Senior National Women’s Football Championships ah khan semi-final an thleng a, kumin National Games khel turin an tling.
Kum 2015 khan Kerala in National Games hi thlengin, kum 7 hnuah Gujarat in a thleng veleh dawn. September ni 29 atanga October ni 10 thleng a awh dawn a ni. Hmeichhe football hi Ahmedabad khawpui a Shahibagh Police Ground ah khelh a ni ang.
National Games khel tur Mizoram team te hi MFA Finance Secretary leh MFA Women’s Committee Chairman ni bawk Lalruatsanga Tochhawng leh hruaitu dangten duhsakna hlanin Airport ah an thlah liam.
Mizoram Women’s Football Team
Goalkeepers
Hmingthansangi, Tlungvel
C. Lalmuanawmi, Reiek
Defenders
Lalchhanhimi, Champhai
Lallungmuani, Tlangpui
Malsawmkimi, Mualpui
Vanlalhriatkimi, Mamit
Gladys Zonunsangi, Armed Veng ‘S’
Lallawmchhungi, Lawngtlai
K. Lalhruaizeli, ITI
Lalramdintluangi, Phulpui
Midfielders
Lalduhthlani Pachuau, Lunglei
Grace Lalrampari, Arhuan
Gospel Vanlalsawmi, Seling
Lalthansangi, Kolasib
Elizabeth Vanlalmawii, Farkawn
Sarah Lalthazovi, W. Phaileng
Lalnuntluangi, Kolasib
Forwards
Lalnunsiami, Bukpui
Jenny VL Hmangaihsangi, Darlawn
Mary Awi Ngaih Dim, Ngaizawl