Aizawl : Champhai district level committee on Myanmar refugees chu nimin khan an Chairman, Champhai Bawrhsap James Lalrinchhana hovin an thukhawm a. Raltlante chhawmdawl kawnga agency-te hmalakna chiang zawka hriat a nih theihna turin an hmalaknate Bawrhsap hnena thlen tura hriattir ni se, an ti.
Village level committee on Myanmar refugees-te pawh tun aia chak zawka kalpui ni se, an ti a. Thuneitute hriatpui loh a duh dan ang anga raltlan veivak thinte khuahkhirh a tul thu leh, ram buai avanga inhumhimna zawng an nih angin an duhthu ang hawi zawng zawnga an khawsak loh nan leh, ram dan te tha taka an zawm theih nana tanlak a tul thute an sawi.
He thutkhawma tarlan a nih danin Champhai district-ah raltlan 9488 an awm mek a, camp 34 awm mekin, mi 9488 tan temporary ID siam a ni tawh. Tun thla ni 24 thleng khan COVID19 vaccine first dose la 3698 (38.98%) leh second dose la 1989 (20.97%) an awm tawh bawk.