Aizawl New Market chhunga building pahnih thiah taka sumdawng chhungkaw 2,000 chuangte chu bazar thar tur sak mai a la nih loh avangin an mangang tawh hle a, sumdawng pawl hrang hrangin sorkar chu hma la thuai turin an phut.
New Market Joint Sumdawng Association (NMSJA) chuan nimin khan new market building thiah tak hmunah thuthar thehdarhtute kawmin foreign lane thiah tak sak mek chu sa zo thuai tur leh main building sak hna pawh sorkarin tan thuai se an duh thu an sawi a. Sorkar chu an mangangna au thawmin beng harh tawh se an duh thu an sawi.
NMSJA President R Lalthangzama chuan pawisa a awm tih sawi reng chunga an awmna tur sak a la ni lo chu sumdawngte hmuhsitna, rahbehna leh zah lohna lian takah ngaiin, an ngaithiam thei lo tih a sawi a, “Sumdawngte hi kan tap tawh a ni,” a ti.
Sorkar kar nan office kai tur dan emaw, tharum thawh zawnga che rih loa smart taka sorkar chu nawr duh mah se an dinhmunin a zir loh miau chuan an duh loh dan anga an chet hun pawh a la awm thei tih R Lalthangzama chuan a sawi.
Tender chhuah chungchangah pawh thu an tiam ang chu an tihlawhtling hlei thei lo tiin, “Pa chang an ni a, khaw êng pawh an zah lo em ni? Keimahni hi engahmah min ngai lo a nih pawhin khaw êng tal hi zah se, heti ngawta innamnul hi na kan ti a ni,” a ti.
NMSJA hruaitute chuan new market building thiah a nih dante chanchinbumite chu hrilhfiahin, new market huam chhunga awm foreign lane tih thin, tuna Aizawl City Centre (Annex) lo ni ta, dawr 128 vel awmna chu kum 2018 atang khan thiah tan a ni tih an sawi a, pawisa awm sa kum thum chhunga sak zawh tur a tih a nih thu an sawi.
Hetihlai hian building satute hian an sakna senso pawisa sorkarin a pek that loh avangin hna an thawk chak lo hle tih sawiin, sorkar chu building sak mek sa zo thuai tura hma la turin an ngen tih an sawi a ni.
Dawr 1,000 chuang awmna, new market building, tuna Aizawl City Centre tih tak chu MNF-in sorkarna an chan hnu atanga hun reilo teah thiah tura hmalak a ni tih sawiin, sumdawngte pawh insawn chhuak tura hriattir an nih thu leh kum 2019 Krismas chu awmtir tura an dil angin hemi kum hi chu an awm tluan tih an sawi.
Kum 2020 khan hripui leng chu remchangah hmangin chhuak tura na taka nawr an nih thu leh July, 2020-ah building chu thiah tan a nih tak thu an sawi a, “Sorkarin kan awm lailawkna tura a ruahman hi dawr siamna chi a ni lo a, second hand zuar awmna tura an tih phei chu hawn pawh a la ni lo,” an ti.
Main building thiah tak sak thatna tur sum chu UD&PA kutah a awm vek tih leh January thla khan market building sakna atan hian tender chhuah a nih dawn thu sawrkar lam chuan an sawi a; mahse, tender an chhuah lo tih an sawi.
UD&PA changtu, deputy chief minister chuan March thlaa session-ah kum thara tender tur anga a sawi chungin tun thlengin tender chhuah a la ni lo tih an sawi a, sorkarin hma a la chak lo lutuk chu an hrethiam lo tih leh building pahnih thiah taka eizawng chhungkaw 2,219-te chu an mangang tawh hle tih an sawi bawk a ni.