India khawthlang lam, Gujarat-a rante awmna tur enkawltu charitable trust-te chuan sorkarin puihna pek a tiam a pek loh avanga lungawi lohna lantir nan bawng sang rual khawlaiah an chhuah.
Video thehdarhah chuan bawngte chu sorkar building pawimawh tak taka hung chhunga an tla leh a chhunga an lut te pawh a lang.
Lungawi lohna lantirtute hian sorkarin an intiam anga puihna a pek loh chuan an state inthlan lo awm tur chu boycott an tum tih an sawi.
Gujarat hi Indian state eng emaw zat zingah vun natnain a tihbuai mekah an tel vel a, ranvulh tam takin an thih phah.
Ranvulh 5,800 chuang an thi tawh a, hri hi ran 1,70,000 chuangin an vei niin an sawi bawk.
Bawng hi India-a sakhaw lian ber, Hindu tan an ran thianghlim a ni a, state 18 zetah talh khap a ni a, heng zingah hian Gujarat pawh an tel.
Kum 2017 khan Gujarat hian bawng venhimna tur dan khauh zawk a siam thar nghe nghe a, he dan hnuaiah bawng talhtu chu dam chhung lung in tan thlenga hrem theih a ni.
Thawhlehnia lungawi loten an bawng khung khawm sa an chhuahtir hian kawtthler a tibuai nasa hle a, lirthei veivak a buai a, mi thenkhat tawm hulna hmunte an phin chhe bawk.
Kumin budget-ah Gujarat sorkar chuan bawng leh ran upa tawhte awmna hmun siam nan Rs. vaibelchhe nga lai a dah.
Ran tawmna tur enkawltu (shelter manager)-te erawh chuan heng pawisa hi an la dawng miah lo niin an sawi a, sorkar hian a bum niin an sawi.
Sorkar hotu liante hnenah pawh vawi tam tak an thlenin an sawi tawh a; mahse, tun thlengin eng chhanna lawmawm mah an la dawng lo niin an sawi bawk.
Indian Express chanchinbu chuan charitable trust-te hian bawng awmna tur (cowshed) 1,750 lai an enkawl a, hetah hian ran 4,50,000 chuang awm theiin an zavaiin an nuar ta niin a tar lang.
“BJP rorelna state dang – Uttar Pradesh, Haryana, Madhya Pradesh, Uttarakhand-ah chuan puihna pek an ni a. Congress-rorelna, Rajasthan-ah pawh bawng pakhat tan Rs. 50 pek a ni a. Gujarat-ah hian ngati nge sorkar hian a tih ve loh?” tiin bawng damlote awmtirna hmun, Gujarat Gau Seva Sangh-a general secretary Vipul Mali chuan a sawi.
Ni rei vak lo kal ta atang khan Gujarat hmun hrang hrangah ranvulhte hi kawng laiah an awm a, court chhung leh sorkar building-ah te pawh an lut nia sawi a ni.