Aizawl : Congress thalaiin sorkarin suma harsatna a tawh chungchangah MNF hruaitu ten mipui rilru hruaipen tumin thu dik tawk lo an pholang nasa niin an sawi a. “Mizorama kan buaina ber chu leiba ni lovin, sum enkawl thiamloh avanga a tula hman tur sum indaihlohna zawk a ni” an ti.
Zoramthanga kaihhruai sorkar chu leiba ringawta kalin, an sorkar atanga kum khat a liam hma, kum 2019 kumtawpah Mizoram leiba chu Rs. vbc 8671.79 ah a pung chho dawrh niin Congress thalai chuan an sawi a. Mithiamte chhut danin kuminah Mizoram leiba chu 12553.08 (BE) niin, “state kan nih hnu kum 35 chhunga Mizoram leiba tlingkhawm zaw- ng zawng let dawn chu tun kumli chhung hian leiba a tlingkhawm hman a ni” an ti.
Congress thalai chuan sorkar term kal mek ah kum 4 lek chhungin leiba chu a hma kum 35 leiba let dawn Rs. vbc 5217.53 (71.59%)-in a pung chho hman nia sawiin, “tunah phei chuan kan sorkar hian a mamawh zat phuhhruk na tur khawp leibat tur pawh a hmu zo tawh lo chu a nih hi” an ti.
Leiba a tam em em laiin a tula hman tur pawisa a awm tak loh avangin sorkar chu a talbuai ta mek niin Congress thalai chuan an sawi a. Mipui mamawh ngawih ngawih phuhrukna tur pawisa sorkarin a nei ta lo nia sawiin, “state pachhe tak hian harsatna nasa tak kan tawk ta a ni” an ti bawk.