World Cup khel lo tur Italy in UEFA Nations League-ah a sang pali ah hmun an chang dawn a. Hungary lakah goal hnih khungin Group A3-ah an sang ber.
Thawhtanni zana Budapest a Puskás Aréna a inkhelah European champion tan hian Giacomo Raspadori leh Federico Dimarco ten goal an khung.
Italy hian khelh ruk atang point 11 an hmu a, an khingpuite lakah hian point khat a sang zawkin Hungary hi tlawm lo se a vawikhatna atana Nations League finals khel tur zawk an ni.
Kumtawp a Qatar pan ve lo tur Italy tan striker Raspadori chuan a chetthat a chhunzawm a. Minute 27-naah Hungary defence inthlahdah chu remchangah la in an goal hmahruai a khung.
Hungary in sutna hun tha tak mai an neih chu Italy goalkeeper Gianluigi Donnarumma chuan ropui takin a dansak a. Loic Nego, Callum Styles leh captain Adam Szalai ten goal a an pet chu a zawnin a dang vek.
Italy tan midfielder Dimarco chuan second half tan tir lamah an goal hnihna a khung a. Penalty area chhunga ball siamsak a nih hnuah a khung chiang hle.
Italy coach Roberto Mancini chuan inkhel zawhah, “Minute 70 chhung kan kheltha hle, a tawp minute 20 erawh ka duhkhawp lo viau.” tiin an inkhel a thlirlet.
An dinhmun sawifiah bawkin, “A vawi hnih nan a Nations League finals kan lut hi a pawimawh hle a, mahse kan result tha lo langsarte erawh nawhreh theih a la ni lo.”
“Bul tan that kan tum a, han intuaithar leh hi kan thiam bawk. Tunah hian hlawhtling tura rilru puthmang dik nei team kan induang leh mek.” a ti a.
Sawi belh zelin, “Tuna kan tum rih ber chu December thla kal kan a, hmalam thlir a ni.” tiin World Cup chungchang a sawi.