Aizawl: UD&PA Deptt-in Aizawl Smart City Project hnuaia Aizawl bazarpui building sakthat hna thawk turin Lushai Engineers thlan an nih thu leh September 22 khan anmahni pawh hriattir an nih tawh thu an sawi a. Performance security an thehluh veleh contract agreement sign-in hna pawh tan nghal a nih tur thu an sawi.
Aizawl bazarpuia sumdawng intelkhawm, New Market Joint Sumdawng Association (NMSJA)-in bazar building thiah a nih hnuah sorkarin a thar a sak leh har avanga an mangan thu thuthar thehdarhtute hmaa an sawi tukah nimin khan UD&PA Deptt. chuan thuchhuah siam a, bazarpui sak that chungchanga hmalakna chu sawifiahin DPR peih fel tura buaipui chhungin hun a duh niin an sawi a ni.
UD&PA thuchhuaha tar lan a nih danin new market building sakthat tur design siama inelna buatsaih a nih hnuah Catalyst Architecture-te design thlan a ni a. An design thlan endik leh a nih hnuah bazarpui building sakna tura sum ruahmanin a daih dawn lo tih hriat chhuah a nih avangin siam rem leh a nih hnuah DPR Rs. vbc 42.83 chu peih fel a ni a, “Heti zat sum hmang tur hian Mizoram sorkar chuan March, 2022 khan approval a pe a ni,” an ti bawk.
Aizawl Bazarpui thara awm tura ruahmante:
- Seat awm tur zawng zawng zat: 1,105
(a) Chawhmeh dawr 449
(b) Thingpui dawr 15
(c) Nepnawi dawr 183
(d) Thawmhnaw 206
(e) Secondhand 252
- Motor parking: light vehicle 31 leh two wheeler 79 dah theihna
- Lift: Mihring veivahna tur leh bungraw thiar kualna tur a hranin
- Cold storage
- CCTV camera
- ATM booth
- Food court
- Market office
- Mini conference room