India khawchhak lam, Bihar-a thingtlang khaw pakhat chuan kum 75 zet hnuah sorkar hna thawk an nei ve ta a, nasa takin an lawm.
Kum 30 mi, Rakesh Kumar-a chu sorkar primary sikulah thawk tura lak a ni.
An khaw mite chuan kar hmasaa sorkar hna thawk an awm ta tih an hriat chuan a lawm nan chithlum leh rawng lar tak tak an intheh a ni.
India-ah hian sorkar hna hi hamthatna a tam avangin mi tam takte thawh châk a ni.
Kumar-a hi an khua, Sohagpur awmna district thova khaw dang, Barkurwa-ah a thawk dawn a. An khuaah pawh hian sorkar sikul a awm tho va; mahse, zirtirtute chu an state chhung hmun danga mite an ni hlawm.
An khawtlang hruaitu, Devendra Chowdhary-a chuan Sohagpur-a cheng tam tak hian hlawh tamna thawh ve an duh hle thin a, India-in zalenna a neih, kum 1947 atang khan thawh tuma bei pawh an awm ve nual a; mahse, hlawhtling an awm hleithei lo tih a sawi.
An khua atang hian khawpui lian zawka lehkha zir pawh an awm ve nawk a; mahse, sorkar hnaah tak an lut thei hlawm lo.
Chowdhary-a chuan Kumar-a’n hlawhtlinna a chang ta chu ‘an khuain vanduaina chhum dumin a tuamna ata an chhuak ta’ niin a sawi a. Thalai zawk dangte pawh a cho chhuah ngei tur thu a sawi.
Kumar-a hian an khaw tihlimtu a ni thei chu a lawm thu a sawi a; mahse, a kawng zawh chu a awlsam lo hle tih a sawi.
An khuaa eichawp dawr neitu fapa hian an khaw thenawma khawpui, Muzaffarpur-a high school kalin ni tin mel 20 zet thirsakawrin a inkalh ziah a. A hun awlah zirlai naupang zawkte lehkha a zirtir thinbawk.
Kum 2016-a a pa a thih khan a kawng a khirh lehzual niin a sawi.
“Mahse, ka pa duhthusam kha tihpuitlin ka tum tlat a, doctor emaw, zirtirtu emaw ni turin min duh a. Tunah chuan a suangtuah thin chu a tak a lo chang ta,” a ti.
A hna thar chuan a tan kawng hawng zauvin state exam-a inlana civil servant nih a la tum a ni.