Congress hruaitu hlun, Gandhi chhungkaw tana rinawm reng thin, Digvijaya Singh chuan thla thara an party president inthlan tur chu chuh ve a tum nia sawi thar a ni veleh ta a. A chuh ve a nih chuan mi pathumin an chuh dawn a nih hmel ta hle.
Madhya Pradesh chief minister hlui hian Nilaini zan khan Delhi thlengin ni hnih chhungin chuh turin a hming a pe dawn nia sawi a ni.
Singh-a hi an party-in Rahul Gandhi-a hova Bharat Jodo Yatra kalpui mekah telin Kerala-ah a la awm a, inthlan chuh leh chuh loh chungchang hi Gandhi chhungkua a la sawipui lo nia hriat a ni.
Kum 75 mi hian inthlan puan a nih hnu lawkah khan inthlan hi sawi ri nghalin chuh ve tur angin a insawi thawi tawh a ni.
Tun thla tira chuhtu tura hming langsar hmasa pahnih, Shashi Tharoor leh Ashok Gehlot chungchang an zawhnaah Singh chuan, “Kei pawh ka la awm ve a, engvangin nge tel lo tura min dah ngawt?” tiin a chhang.
Zirtawpnia Jabalpur-a thuthar lakhawmtute a kawmnaah erawh chuan Congress president thlan tur hi chuh a tum loh thu a sawi thung a; mahse, party hotu sangte thu thu a nih a sawi.
Nilaini chawhmaa inthlan a chuh dawn leh dawn loh an zawh chuan Singh chuan, “He thil hi tumah ka la sawipui lo va. Hotu sangte atangin phalna ka la nei lo va, ka chuh dawn emaw, dawn lo emaw, min kalsan phawt teh u,” tiin thuthar lakhawmtute hnenah a sawi.
Tar lan tawh thin angin Congress president thlan turah hian kum 20 chuang hnua a vawi khat nan Gandhi hming a lang dawn lo a nih hmel tawh hle a. Rajasthan Chief Minister Ashok Gehlot-a lamtang MLA helte thawm a ring hle a, Tharoor-a chauhvin chuh tumin hming a la pe lut bawk.
Gandhi chhungkua chuan chuh tumte zingah thlawp bik tumah an la nei lo va, tute pawhin an chuh thei dawn a. Gehlot-a hi Gandhi chhungkaw tana rinawm tlat thin a ni a, president tur pawha an duh ber a ni a; mahse, an state-a a lamtang MLA-te helna chhuak chuan Gandhi chhungkaw ril erawh a rem lo hle a ni.
Gehlot-a’n inthlan a chuh dawn leh dawn loh a chian loh mek lai hian Rajasthan-a an buaina chu chin fel dan kil dang atanga dap mek a ni bawk.
Rajasthan-a Gehlot-a lamtang MLA 92 hel mekte hian thil pathum an phut a, heng zingah hian an inthlan zawha chief minister tur tihfel chauh pawh a tel a. An duh dan hi tihhlawhtlinsak a niha Gehlot-a chu party chief atana thlan a nih bawk chuan amahin an state-a a aiawhtu tur chu a thlang thei dawn tihna a ni.