Aizawl: Mizoram Pradesh Congress Committee (MPCC) President Lalsawta chuan kum 2023 MLA inthlanpui hi Congress party tan mai ni loin, Mizoram tan ram anga a chhiat hlen theihna emaw, a din chhuah lehna emaw a nih dawn avangin theihtawp chhuaha tan lak a tul tih a sawi.
Nilainia Lal Thanhawla Auditorium-ah Aizawl City Block Mahila Conference cum Political Training programme hmanpuitu, an party president hian ram sum leh pai dik lo taka chhek khawltuten tun atangin an sum hman tangkai an tum tih an hriat thu a sawi a. “Party thenkhatten vote (mihring) leiin an sum chu an lungmuanpui a. Keini Congress party chuan hei hi kan duh lo,” a ti.
Lalsawta hian Congress party mipuite chu inthlanpui lo awm tura sum hmanga lei tumtu an awm a nih pawhin lo lak sak lo tur leh, an pawisa an laksakte hnena rinawm loh hi an duh loh avangin vote lei tum an awm a nih pawhin anni chu lei theih an nih loh thua lo chhang turin kalkhawmte a ngen a. Congress mipuite chu an candidate tura an beiseite leh an hotute laka insum tur leh, inthlan kaihhnawih thilah senso mamawh lo phurhruk theih tum zawk tura chah bawkin, Pathian chakna aia sum chakna ringtute ai chuan Congress mipui chu danglam ngam tur an nih thu a sawi.
MPCC Treasurer Zodintluanga pawhin thu sawiin Mizoram tana rotling zawng zawng hi Congress hnathawk vek a nih thu a sawi a. Medical college nei turin theihtawpin an sual a, MIMER tia a hming an vuah, a tithuanawptuten ZMC tia an thlak chu tunah hian central sorkarah an zuar leh mek niin a sawi a. Congress-in Aizawl bazarpui sakna tur pawisa an dah sa vek tawh pawh tun thlengin MNF sorkarin an la sak that duh loh thu a sawi.
Mizoram Pradesh Mahila Congress Committee President Vanlalawmpuii Chawngthu kaihhruai inkhawmah hian resolution pali an pass bawk.
RESOLUTION:
- Hmeichhiaten ram leh khawtlang rorelnaah dinhmun pawimawh kan chelh ve theihna turin Village Council, Local Council leh Aizawl Municipal Council (AMC) ah a bika chanvo (Reservation Seat) min siamsaktu chu Congress sorkar a ni.
- Nupa inthen thuah hmeichhia ten hamthatna kan neih ve theihna turin nupa inthena rosum insem dan tur (The Mizo Marriage, Divorce and Inheritance of Property Act, 2014) min siamtu pawh Congress sorkar a ni. Hmeichhiate tan dinhmun tha min siamsaktu leh hmeichhiate nghaihsaktu Congress party kan nei hi lawmawm kan ti a, keini Mahila-te chuan Mizoram leh Congress party tan theih tawp kan chhuah zel dawn.
- Congress sorkarna hnuaiah khan Mizoramin hmasawnna tam tak kan nei a, sorkar hnathawkin a hun takah hlawh leh an G.P. Fund an la thei a, an pension rualin Pension pawisa an lak chhuah thin bakah Mizoram mipuite’n kan chanvo dik tak kan hmu thin.
- Tuna kan sorkar hrawn mek (MNF) in sum an enkawl thiam loh vanga, hun rei lo te chhunga sorkar leiba tam lutuk kan neihna lak atanga kan ram chhan chhuak a, Mizoram mipuiin kan mamawh ber chu ram mipui sum enkawl thiam, kuthnathawktute tana hamthatna siam theitu tur leh hlemhletna ti bo turin Pu Lalsawta kaihhruai sorkar tha kan neih theih nan Mahila chuan theihtawp kan chhuah dawn a ni.