Ralthuam an enchhin hnu lawkah hian North Korea palai, Kim Song chuan New York-a UN General Assembly-ah thu a sawi.
North chuan ralthuam duan, enchhin, siam leh kawl theihna chanvo a nei niin a sawi.
Kim-a chuan an ramin inven nan leh nakin zela an ram himna tur leh a muanawm zawkna turin hmanrua an siam tih a sawi niin AFP chuan a tar lang.
North Korea hian South chuan sipai lamah an letin hma an la nasa zawk niin a sawi bawk.
South Korea hian tun hnai khan tuihnuailawng atanga ballistic missile kah theih an neih hmasak ber chu an enchhin ve bawk a, North Korea-in an tihthaih fo an chhanna niin an insawi.
North Korea hian Supreme People’s Assembly session chu Thawhlehni zan khan an nei dawn bawk nia sawi a ni.
Hetah hian thalaite zirna leh ei bar lama ruahmanna tharte an sawi dawn nia ngaih a ni.
North Korea hi kum khat chuang ramri an khar tawh avangin ei bar an harsa hle a. An thawhpui tha ber, China nena an indawrna pawh Covid-19 avangin an titawp vek.
Hetih lai hian ralthuam an buaipui erawh an chawlhsan chuang lo va. August thla khan UN atomic agency chuan nuclear ralthuam siamna tura plutonium siam turin an reactor an tinung leh tawh niin an sawi.