Mizoram Premier League round 5-na inkhel hnuhnung pahnihah Aizawl chhuah lam club pahnihten hnehna pawimawh an chang a. Chhinga Veng FC leh Electric Veng FC ten an khingpui an hneh.
Nilaini a Rajiv Gandhi Stadium a inkhel hmasa zawkah Chhinga Veng FC in Chawnpui FC an hmachhawn a. 1-0 in an khingpui an hneh.
Kum 2018 champion Chhinga Veng hi tun season a tlawm la nei lo awmchhun nimahsela goal khung an harsat thin avangin hnehna vawikhat chauh an la chang a. Chawnpui laka an goal pawh anmahni khung a ni lo.
First half minute 29-naah Chhinga Veng in goal an nawr a, midfielder Johny-a ball vawrh luh chu Chawnpui defender Ephraim Vanlalduhsaka chuan an lamah a ti lut palh.
Chawnpui coach Lalsangzuala Hmar in a team goal nawr ni ta turin Lalsawmzela leh Lalliansanga te a dah lut a, chance tha neih phah mahse a pawimawh ber goal an khung thei lo.
Inkhel hnuhnung zawkah Electric Veng FC in MPL9 a vawikhatna atan hnehna an chang a. FC Bethlehem chu inkhel hmuhnawmah 3-2 in an hneh.
Football hmuhnawm leh huaisen khel thin Electric Veng in an hlauhawmna tilangin chhanlet lohin goal thum an khung a. Vanlalremsanga’n first half a goal a khung hnuah Vanlalremkima leh Malsawmhlua ten second half-ah an chhunzawm.
Mahse nidang ang thovin a hnung lamah an inveng zo lo teuh leh hle a. Bethlehem in Lalnunzira leh Lawmsangzuala hmangin an chhanglet a, an si phurh sutna tur erawh an neih belh thei lo.