North Korea chuan Thawhlehni hma tak khan khawchhak lam vaukam atangin tuipui lamah hmun hla lo kap chi missile a enchhin niin South Korea sipaite chuan an sawi.
Ralthuam an enchhin leh hnu lawk hian UN-a North Korea ram palai chuan tumahin Pyongyang-in mahni invenna tur leh ralthuam enchhin tura dikna chanvo a neih chu an dal thei lo tih a sawi.
Tun thla tir khan Pyongyang hian ballistic leh cruise missile a lo enchhin tawh bawk.
Hetih lai hian tun hnai lawk khan a thenawm, South nena inbiak pawh a inpeih thu a sawi bawk.
United States sipaite chuan Thawhlehnia thuchhuah an siamah missile kah mai a hlauhthawnawm tih an sawi a; mahse, anmahni leh an thawhpui ramte tana hlauhawm erawh a ni lo tih an sawi bawk.
Hetih rual vek hian US Indo-Pacific Command chuan ralthuam enchhin hian North Korea-in dan pela ralthuam siam a kalpui tih a lantir tih a tar lang.
Thawhlehni khan Japanese chanchinbute chuan North thil a kah chhuah hi ballistic missile a ni thei niin an defence ministry chuan a sawi niin an tar lang a. A lo nih chuan United Nations hreknain enchhin a phal loh zinga mi a ni.
South Korean President Moon Jae-in chuan Seoul-a National Security Council chu Pyongyang-in missile a kah chhin leh tun hnaia Kim Jong-un-a farnu, Kim Yo-jong-i thu sawite zir chiang turin a hriattir nghal.
Kim-i hian tun hnai lawk khan Korean War titawp tura Moon-a biak an inpeih reng thu a sawi a; mahse, South-in hmelma ena a enna thil a tihtawp vek a phut thung.