Aizawl: Aizawl veng pakhata hmeichhe naupang pakhat pawngsual nia hriat boral ta lainattuten nimin khan Vanapa Hall kawtah an tawrhpuizia lantir nan punkhawm an huaihawt.
Punkhawm huaihawttute zinga mi, LC Varte chuan social media kaltlangin pawngsual ni ngeia rinhlelh hmeichhe naupang boral ta lainattute chu an intelkhawm niin a sawi a. Hmeichhe naupang chunga thil thleng chu an tawrhpuizia lantir nan punkhawm chu huaihawt ta an nih thu leh he thubuai chhuitu police-te chu an thlawp tlat thu a sawi.
Pungkhawmte chuan ‘naupang pawngsualtu chu a rang thei ang bera man ni rawh se’ tih te, ‘pawngsualtu man a nih hma chu khawtlang a him thei lo’ tih te, ‘pawngsualtu hrem hi kan ngam tur a ni’ ti tein an au rual a, naupang chunga thil thleng an demna thu ziak hrang hrang an keng bawk.
Tar lan tawh angin tun hnaia Aizawl veng pakhata naupang kumtlinglo thih thu-ah thil rinhlelhawm awm theia a lan avangin police-in suo-moto-in POCSO, section 6 leh Indian penal code (IPC) section 376 (AB) tlawhchhanin thubuai an ziak lut a, chanchin buatsaih lai thleng hian pawngsualtu nia rinhlelh man erawh an la nei lo thung.