Nilaini zana Gehlot-a’n party president, Sonia Gandhi-i hmuh a tum chu sawn leh rih niin inthlan chuh pawh a tum zui rih zel a. Chief minister a nihna atang pawhin bân mai a tum rih lo bawk.
Gehlot-a hi Nilaini zan khan an state-ah dan leh thupek lam kenkawhna thilah an state-a a thuihhruaite hmuin Ninganiah Delhi a pan zawk dawn a, Gandhi nen an inkawm ang.
“Congress chu Gehlot-a kaihhruaina hnuaiah a kal zel dawn a, a bân chungchang kan la sawi lo va. Vawiinah a bâng lo va, nakinah pawh a bâng lo vang,” tiin an said state minister Pratap Singh Kachariyawas chuan a sawi.
Minister dang, Vishvendra Singh pawhin, “Pu Gehlot-a hian Rajasthan-ah hian a kum nga hun a hmang zo dawn,” a ti.
Congress hian mi pakhatin chanvo lian pahnih chan loh an kalpui mek a, bân a tum ta si lo a nih chuan Gehlot-a hian party president nih a tum ta lo em ni ang tih zawhna a awm mek bawk.
Gehlot-a hian party president inthlan chuh a tum a, Rajasthan chief minister a nihna kalsan a tum chuang lo chu tuna Congress chhung buaina a ni mek.
Pathianni khan a lamtang MLA 90 chuang zet chuan Gehlot-a hi party chief a niha a aiawha Rajasthan-ah Sachin Pilot-a a lal a nih chuan bân vek an tum thu an sawi a ni.
Amah thlawptu MLA rualte an hel chungchangah hian Gehlot-a hian engmah inrawlhna a neih loh thu a lo sawi tawh a; mahse, an hotu liante chuan a thu hmu lova hetiang a thlen an ring lo hle.
Congress hian Gandhi chhungkaw hming lang lovin president an thlang dawn ta a. October 17 inthlan turah hian Tharoor leh Gehlot bakah Singh chu chuh tura sawi rik mek an ni.