Tun laia Mizorama sazu puangin khaw 100 chuanga lo neitute thlawhhma a bei tawh a, sazu rual chetna, Serchhip Zawlpui Zau leiletah nimin khan sazu hrai rûnpui neih a ni.
Serchhip district agriculture department bultuma Zawlpui zaua sazu hrai rûnpui neihah hian Asst. District Agriculture Officer Lalrinawma’n lo neitute hnenah sazu tûr hman dan/sazu hrai dan a zirtir hmasa a, sazu tûr an sem hnuah a huhovin sazu hrai rûnpui chu an nei zui a; a hrai nan hian tûr chi hnih – Zinc Phosphite leh Roban te an hmang.
Tun hnaia sazu puang hian Serchhip district-a khaw thenkhat chu tibuaiin tlangram buhte seng tur awm lo khawpin sazuin a suamsam a, tun hnai mai khan Serchhip Zawlpui Zau Leileta thar rang buhte pawh an bei ve leh.
Serchhip Zawlpui Zaua Field Management Committee hruaitute chuan kum dangah sazu vanga harsatna an la tawh ngai loh thu sawiin, kumina hetiang thil lo thleng chu an tan thil thar a nih thu an sawi.
Agriculture department-in an harsatna hriaa sazu hrai rûnpui rang taka an neihpui chu lawmawm an tih thu an sawi rualin, an leileta buhte an hmin chhoh mai dawn avangin sazu laka an him ngei theihna turin sorkarin ngaihsak zui zel se an duh thu an sawi bawk.
Tar lan tawh thin angin tunlai hian Mizoram hmun hrang hrangah sazu a puang a, agriculture department-in sazu puanna hmun an chhinchhiah pawh a pung zel, department-in an chhinchhiah chinah district pariat – Aizawl, Lunglei, Siaha, Kolasib, Serchhip, Mamit, Saitual leh Hnahthialah te sazu puangin, khaw 104-a lo neitute thlawhhma hectare 524.31 zeta zau buh hmun a khawih chhe tawh a ni.
Sazu puang ven nan hian agricutlure department chuan thla liam ta atang khan sazu tûr semin sazu puang thunun dan turte lo neitute an zirtir tawh a, hei hi district tina kalpui a ni.