Argentina in a zawna match 35 tlawm lova an kalna ni turin hnehna an chang a. Kumtawp World Cup khel tura an inbuatsaihna inkhelah 3-0 in Jamaica an hneh.
Harrison, New Jersey a inkhelah Argentina ta Lionel Messi chuan second half-ah goal hnih a khung a. Messi hi substitute bench atanga dah luh a nih hnuah goal hnih khungin ram tana vawi 164 a inkhelhnaah goal 90 a khung tling tawh a. Argentina hi vawi 100 a chakpuina chiah a ni.
La Albiceleste tan hian minute 13-naah Manchester City striker Julian Alvarez chuan an goal hmahruai a khung.
Argentina in kum 35 mi Messi tel lo pawhin team hlauhawm leh inkhairual an nihna an lantir thei a. Tunhnaia Europe ram lian ho an chetthat tluan loh avangin a zawna vawi 13 World Cup an khelhna turah rinkai zingah an tel dawn.
Hetihlai hian Brazil pawhin Thawhlehni zan khan an World Cup inbuatsaihna inkhel hnuhnung ber an hmachhawn a. 5-1 in Tunisia an hneh.
Parc des Princes a inkhelah Brazil tan Raphinha chuan goal hnih a khung a. Richarlison, Neymar leh Flamengo striker Pedro ten goal dang an khung.