India ram chhunga infiamna khawmpui lian – 2022 National Games of India chu vawiin (September 29, Ningani) tlai khan Prime Minister Narendra Modi chuan Narendra Modi stadium, Ahmedabad, Gujarat-ah a hawng.
36th National Games hawnna hunah hian Mizoram atangin sports minister Robert Romawia Royte, sports department secretary Lalrozama IAS, Mizoram Olympic Association (MOA) vice president Lallianthuama leh MOA joint secretary Joseph Thansanga te an tel.
Mizoram sawrkar lam bakah hian, inelna hmachhawn tura a hmun thleng hmasa Football, Archery, Weightlifting, Athletics leh Wrestling aiawhte an tel a, Mizoram Contingent Chef de Mission V. Lalzawmliana leh Dy Chef de Mission Lalduhkima Sailo ten an ho bawk.
Tun tum National Games-ah hian Mizoram atangin infiammi mipa 16 leh hmeichhia 29 an vaiin 45 an tel thei a, coaching staff chhiar telin Mizoram hminga feh chhuakte hi mi 60 an ni.
Mizoram inlan hun
Archery: September 30 atangin
Football (Women): October 1 – 11
Weightlifting: September 30 atangin
Boxing: October 5 atangin
Judo: October 7 – 11
Athletics: September 30 – October 4
Swimming: October 2 – 8
Wrestling: September 30 – October 2
Wushu: October 8 – 11