Kawngpui tha nei tur kan ni tawh; sorkar che teh se!
Assembly house ah Mizoram kawngpui that vanga lawmna lam lo aupui tawh nimahse, tunah hian hmun thenkhatah chuan kawngpui chhia vangin khaw tam takin harsatna an tawk leh mek tawh a, tlawh pawh hleih theih loh khaw tam tak a awm leh tawh niin a lang!
Kan sawi fo thin angin kawngpui tha hi chuan chetvelna leh hmasawnna engkim hi a keng tel a, ramri buaina vanga kan tawrh thin tam takah pawh hian kawngpui tha nei ila kan pumpelh theih tam tak a awm. Muangleia awm thei kan ni lo tih hi hriatreng a, tuna ngaihngama kan awm laite hian sum neih ang ang hmang pawha thawh chho zel hi hun tak a ni.
Kawngpui siam vangin inkalpawhna kawng tam takin a tuar a, ruahtui a tlak nasat avangin kawng a chhe zual hle bawk. Hmun thenkhat phei chu enkawltu awm lo ang mai a ni hial. Sorkar hian ennawnin, vil hneh thin se a va duhawm em. Khaw tam takin harsatna an tawh phah a, mihring tam takin buaina nasa zawk an tawh phah bawk. An tawrhna hi thuthmun atanga thlir ngawt a fuh lo ang.
Eng sorkar ah pawh kawngpui tha kan nei hlei thei lo zel mai hi a ninawm tawh a, PWD hi chief minister ten an chan zel avang hian duh chuan hma la chak thei awm tak an ni bawk nen, chhuan lam tur eng eng emaw an la nei zel thung a; kan kawngpui hi chuan ngaihthah mai lova, ngaihsaktu a va ngai nasa tawh em. Ram mipuite pawh politics tuinu a buai lovin, a taka che ngam hruaitu nei turin i inbuatsaih thar ang u.