Tyson Fury chuan December thla a heavyweight world-title fight a inhmachhawn turin a hnampui Anthony Joshua chu a nawr leh a. British boxing fans ten an hmuh duh chu thlentir turin a ti.
Kum 34 mi WBC champion lai Fury hian kum 32 mi Joshua hi Thawhtanni thleng kha contract ziahna hun a pe tawh a. Mahse tunhnaiah social media kaltlangin nizan thleng khan hun a pawhsei thu a sawi.
Hetihlai hian Joshua promoter Eddie Hearn chuan Fury-a’n a thu a thlak sek mai chu mak a ti a. Hetianga indawr chu an tan a theih loh a, inremna neih a harsat thu a sawi ve bawk.
Fury hian, “Tunah chuan in thutlukna a ni tawh. Keini lam a fel tawh a, BT Sport, DAZN leh ESPN ten an remti vek a, nangmahni chiah kan nghak. Zahawmna in nei a, humhim ve intum a nih chuan vawiinah contract hi in ziak ang.”
“I tan thil tha tak ka tihsak dawn che a ni. Ka hnek hrep dawn che tih ka hria a, i tan huntha ka siamsak dawn che a ni.” a ti bawk.
Hearn chuan Fury-a thusawi chungchanga a ngaihdan sawiin, “Eng nge a tih leh dawn sawi theih pawh a ni lo. Inremna neih a, engkim tihfel hi kan hlat lo. Mahse Tyson Fury zawk hian a duh tak tak em ka hre lo. Lehlam lehlam atangin British boxing chanchin a fight ropui ber tur hi thlen tir tumna a awm. Mahse tun dinhmunah eng nge kan rilru put dik tak kan inhriatpui tawn lo a ni.” a ti.