Aizawl: Ni thum awh tur state 10 puala malaria umbo kawnga hmalakna thlirletna chu nimin khan Aizawl-ah tan a ni a, Health Minister Dr R Lalthangliana’n tun dinhmunah Mizoram chu India rama malaria tamna ber state a nih mek thu a sawi.
Health Minister Dr R Lalthangliana chuan tun dinhmunah Mizoram chu mihring awm zata chhutin India-a malaria tamna ber state a nih mek thu a sawi a, Mizorama district pali – Lunglei, Lawngtlai, Siaha leh Mamit chu a tamna (high endemic district)-ah a awm mek tih sawiin, Mizorama malaria vei zinga za-a 80 chu heng district palia mite hi an nih thu a sawi bawk.
Kumin January atanga August thlengin malaria vei 7,672 hmuh chhuah an nih thu leh thihpui mi panga an awm thu minister chuan a sawi a. Nikumah January atanga December thlengin malaria vei 5,637 hmuh an nih thu leh thih mi 10 an awm thu sawiin, nikum aiin kumin thla riat chhung leka malaria vei hmuh an tam chuan sorkar pawh nasa lehzualin tan a laktir niin a sawi.
He thutkhawma tar lan a nih danin kum 2017 atanga kumin August thleng khan Mizoramah malaria vei 40,212 hmuh an ni tawh a, malaria thihpui mi 36 an awm.
Kum 2017 atanga 2021 chhunga malaria vei an tam ber kum chu 2019 niin, 8,010 an awm a, thihpui an tam ber kum nikum 2021 kha niin, mi 10 an thi.
Regional review meeting hi kum tin thla thum dana neih thin niin, Global Fund for AIDS, Tuberculosis, Malaria (GFATM) Projected States a tel hmarchhak state pasarih – Assam, Meghalaya, Tripura, Nagaland, Arunachal Pradesh, Manipur, Mizoram leh Jharkhand, Odisha leh Chhattisgarh-ah te neih thin a ni.
Tun tum thutkhawmah hian state 10 atanga Vector Borne Disease Control programme-a programme officer, regional director, consultant bakah sorkar laipui atanga mi thiam mi 80 vel an tel a, India-a malaria umbo a nih theihna tura hmasawnna tur zirhona leh umbo kawnga hmalaknate an thlirho.