Arsenal midfielder Emile Smith Rowe chu tunhnaiah a hliam a neih in dam lam a pan hleihtheih loh avangin zai a ni a. December thla hma chu team training a zawm thei dawn lo tih Gunners in an sawi.
Kum 22 mi Smith Rowe hian season liamta khan Gunners tan Premier League goal 10 khungin an player pawimawh ber zinga tel turin a invawrh. Nimahsela hliam a neih avangin tun season-ah substitute bench atang vawi li bak khelmual a la lut lova. A inlan hnuhnun ber tum hi Manchester United laka an tlawm tum kha niin he inkhelah hian a hliam hi a tihnat belh nasa hle niin an sawi.
“Tunhnai thla engemaw zat chhung khan Emile Smith Rowe hian kap bawrah hian tha lama harsatna a nei a, hei hian a training neih theih dan leh inkhelh theih dan a nghawng thui.”
“Manchester United nen Premier League a kan inkhelh tumin nasa takin a intihnat belh a, kan medical team bakah specialist te nen kan inrawn hnuah a hliam hi zai turin thutlukna kan siam.”
Tunhnaiah London-ah hlawhtling taka zai a ni a, Emile-a lo kir lehna tur hi a intan der tawh. December-ah chuan training pangngai a zawm hman tawh kan beisei.” tiin an sawi chiang.
Smith Rowe hi chawl rei dawn mahse season a chatlak dawn a, November leh December-ah World Cup khelh a nih dawn avangin inkhel a tel ve theih lohna a nei tam lutuk dawn lo niin a lang. Hetih rual hian Premier League match sarih a khelh loh bakah Europa League leh League Cup a an khelh turte erawh a tel thei dawn lo chiang.
Arsenal hian Inrinni zanah an hmelma Tottenham Hotspur nen North London derby an khel ang.