Inhliam avanga player chhawr theih loh an ngah avangin Liverpool in season bul an tan danah beisei an pha lova. He buaina hian kiam lam a pan dawn niin a lang a. Defender Ibrahima Konate leh midfielder Jordan Henderson te an inkhel leh thei tawh dawn.
French center-back Konate hian khup hliam avanga thla hnih chhung a chawlh hnuah tunkar khan training pangngai a zawm leh tawh a. Tun kartawp a Brighton & Hove Albion an hmachhawn hunah player thlan theih zingah a tel tawh dawn.
Hetihlai hian England midfielder Henderson pawh hian tihrawl hliam avanga a chawlh hnuah dam leh tawhin England in Germany an hmachhawn tumin second half-ah khelmual a lut thei tawh.
Jurgen Klopp-a squad hian player inhliam an ngah hle a, mahse zia lam pan tawhin international break hma in Thiago Alcantara, Joel Matip leh Diogo Jota te an inkhel thei vek tawh a. Curtis Jones leh Calvin Ramsay te pawhin training mumal zawm an hnaih tawh.
Hetihlai hian Naby Keita leh Alex Oxlade-Chamberlain te erawhin October thla an nghah a la ngai dawn a. Left-back rinrawl Andy Robertson pawh a chawlh a la ngaih dawn avangin a aiah Kostas Tsimikas rin a la ni ang.
Konate leh Henderson te hi tunhnaia Liverpool inkhel thlirin an tel loh an tuar tih a lang. Kum 23 mi defender hi a tlanchakna leh tharum a hman thiam chu Klopp-a’n defensive line hma taka a rem thinah a tangkai. Tunhnaiah Liverpool tlarhnung hi a phui tawk lo hle.
Captain Henderson hi khelmual pawn leh chhungah team kaihruaitu a ni a. Inkhela langsar ber ni kher thin lo mahse a team a kaihhruai thiam avangin Liverpool in an khelhthat phah fo thin.