Myanmar tual chhung buaina avanga Mizoram raltlan zinga sikul kai rual naupang eng emaw zatin Mizoramah lehkha an zir a, education department-in a chhinchhiah chinah zirna in hrang hrangah raltlan zirlai 6,000 vel an lut mek, an zingah Mizo tawnga harsatna nei an tam lo.
Education department hotute hnen atanga thu dawn danin 2022-23 academic session kal mekah raltlan naupang sikul kai 6,000 vel an awm mek a, raltlan hi Myanmar lama let leh ta leh Mizorama rawn lut leh an indawt zut avangin chhinchhiah fel a har a, department pawhin chiang fakin an hre thei lo.
Education department hotute sawi danin raltlan zirlai zinga a tam ber chu primary school-a lut an ni a, middle school naupang pawh an thahnem a, high school leh higher secondary school-ah erawh an tam lo.
Myanmar raltlan, Mizorama zirna chhunzawm zingah tawng lama harsatna nei, an zirtirtute thu sawi hrethiam lo chu awm ve bawk mah se, an tam lo va, Mizo tawng thiam lo zirlai pui tura Myanmar tawng thiam zirtirtu rawih tlem azawngte chu zirna in thenkhatah an awm thu education department hotute chuan an sawi.
Kum hmasa 2021-22 session-ah khan raltlan zirlai 6,195 awm angin department chuan a chhinchhiah a, Mizoram Board of School Education (MBSE)-in kumina HSLC exam a buatsaihah khan raltlan naupang 31 an exam a, an zinga 28 an pass a; HSSLC bikah chuan raltlang zirlai zingah exam an la awm lo thung.