Aizawl: Social Activist Vanramchhuangi (Ruatfela Nu) chuan tun hnaia hmeichhe naupang chunga pawikhawihna thlengah naute nu leh pa lakah Zonuam Police Station-ah First Information Report (FIR) a theh lut.
Vanramchhuangi’n FIR a theh luhah hian hmeichhe naupang thihna chungchangah leh naupang nu leh pa lo chu rinhlelh kai a neih loh thu leh vantlang pawhin an rin ber a nih thu a tar lang.
He pawikhawihna hian The Protection of Children from Sexual Offences Act, 2012-ah he pawikhawihna hi cognizable offence a nih avangin pawikhawihtu rinhlelh an awm a nih chuan i-he loa man (arrest) mai tur a nih laiin, vawiin thlengin tumah man an la ni lo hi hriatthiam a har a tih thu a tar lang.
He naupang chunga pawikhawihna thleng, Suo Moto case kalpui mekah swab sample lak tawh a nih thu leh forensic atanga report ngaihchan mek a nih thute a lo hriatin, tuna pawikhawihna case-hi seniority kal kâna hmanhmawh taka hnathawhpui nghal pawh ni se, hetiang swab sample hi finding nei turin a tlem berah ni 10 vel nghah a ngaih avangin, result hi nghah chi nia a hriat loh thu leh, thubuai dangah hetiang sample test result nghak kher loin man tulte chu man nghal mai an ni thin a nih laia, rinhlelh kai ber ni bawk, naute nu leh pate zalena an la awm hi thubuai chhui zelna atan thil pawi tak thlen thei a nih avangin, an nupa hian khung hran vat tura a ngen bakah he pawikhawihna rapthlak tak hi ‘Standard of Procedure (issued by MHA, Govt. of India for investigation of Rape Cases) tlawhchhana chhui hna thawk tura ngenin FIR hi theh lut a nih thu Ruatfela Nu hian a sawi.