Aizawl: Health & Family Welfare department enkawl primary health centre paruk chu mipui tana chhawr tangkai theih lohin a awm mek a, doctor an awm loh bakah damlo mutna khum pawh a awm lo.
Health department-in RTI hmanga zawhna an chhan danin doctor leh damlo khum awm lohnate hi Mamit district-a Kanhmun PHC leh Tuipuibari PHC, Lawngtlai district-a Borapansuri PHC leh Longpuinghat PHC, Lunglei district-a Zobawk PHC leh Siaha district-a Chhuarlung PHC te an ni.
Hetihlai hian Sairang PHC, Darlawn PHC leh S. Vanlaiphai PHC-ah te chuan doctor duty pahnih an nei thung.
Health department-in RTI zawhna a chhan danin heng PHC paruk, doctor leh damlo khum pawh awm lohnaah hian PHC chhawrtu tur mihring 63,456 an awm niin a tar lang a; Champhai, Lunglei, Hnahthial leh Saiha district-ah te community health centre a awm lo bawk.
Sorkar enkawl damdawi in hrang hrang zingah Civil Hospital, Aizawl chu doctor awm tamna ber niin, doctor 93 an awm mek a. Civil Hospital, Lunglei-in dawtin, doctor 24 an awm a, Saitual leh Khawzawl District Hospital te chu doctor awm tlemna niin doctor pali chauh an nei a ni.