Aizawl : Tourism deptt-a provisional employee Boatman (IV Grade) Tamdil-a thawk K Lalrohlua ban a nih chungchangah twitter-a Tamdila riahna hmunhma leh bungrua leh thawktu chungchang tweet tu Kolkata lam mi Nilanjan Bhattacharjee-a’n a tweet avanga Boatman ban a ni nghal mai chu pawi a tih thu a sawi.
Mizoramin tourism lama hma a sawn theihna tur mithahnemngai ten nimina Saitual joint VC sitting hall-a an sawihonaah Nilanjan Bhattacharjee (High Altitude Trek Expert, Kolkata) chuan a tweet avanga Boatman-in a hna a chan ta mai pawi a tih thu hi a sawi a. A tweet chu Tamdil tourist hmun tlabal lutuk veiawm a tih thu sawidarh a tumna a nih tuh leh thawktu ban lam chu a rilruin a tum a nih loh thu a sawi.
Nilanjan chuan Tamdil tourist hmun tlabal lutukin hma a sawn theihna tura a thahnemngaihna Boatman-in a tuar ta mai chu pawi a tih takzet thu sawiin, a hna chhunzawm leh ngei se a duhsak thu a sawi a. Social media-a a auchhuahna rilru tak chu social media lamah pawh sawifiah leh ngei a tum thu a sawi bawk.
He inkawmhonaah hi Saitual Jt.VC Chairman Ramchhuanmawia’n kaihhriain, khawtlang hruaitu, YMA Park committee chairman, Saitual youth adventure club hruaitute, MJA Saitual leh Tourism lam tuipuitute bakah khualzin aiawhin Nilanjan Bhattacharjee, Trishna Mohanty, BBC Travel Writer/Photographer leh Lallawmzuali, Activist Durtlang te an tel.
Tarlan tawh angin tun thla ni 27 chawhnu lam khan Nilanjan hian Twitter-ah Tamdila tourist hmun enkawltuin zu a ruih thu leh a hmunhma a tlakbal nasat thu te a tweet-a, a tuk tun thla ni 28-ah Tourism deptt. Director-in Tourism deptt-a provisional employee Boatman Tamdil-a thawk K. Lalrohlua banna thupek a tichhuak zui nghal a ni.
Thudawnnain a sawi danin, Twitter-a Nilanjan-a tweet enin, Boatman chungchang chu a ngaihmawh a tarlan zinga pakhat chauh a ni a, inthiarnaah tui a awm loh thu te, thosilen leh awngphah țha pawh a awm loh thu te leh darthlalang leh street light a awm loh thu te pawh a tarlang a, hengah hian Bo atman ni lo, mawhphurtu dang an awm ngei a rinawm thu leh action lak a ni ve dawn em tih chu hriat a nih loh thu atanga thudawnna chuan a sawi bawk.