Aizawl: September 26, 2022-a Mizo Hnam Runa MNF President Zoramthanga, Chief Minister-in ‘mipui bum tumin thu chhumbung sawi an awm thin’ tia a sawi chu amah a insawina nge, a dawt sawi thin sawi mam a tumna zawk tichiang turin Congress party-in an ngen.
Nimina thuchhuah an siamah MPYCC hian, ‘Aizawl khawpui hi traffic jam awm lohna state capital-ah chuan a awm chhun a ni tih turin kan siam dawn’ a tih te, ‘Mizoram hi Switzerland of the East-ah kan siam ang,’ tih te, ‘kan sorkar hunah vai buhfai kan ei tawh lovang’ tih te, ‘kum thum chhungin ei leh barah kan intodelh thei’ tih te, ‘kan sorkar chuan chhungkaw tinte hnenah, NLUP dawng tawh zawng zawng pawh cheng nuai thum kan pe dawn’ tih te, ‘aA dam lo apiangte hman turin SEDP-ah nuai hnih kan dah’ tihte hi a chhumbung chauh ni lo, a tluana mipui bumna a ni zawk niin an tar lang.
Congress party hian Mizoram mipuiten party hruaitute zingah tu ber hi nge mipui hnena dawt sawi ngun ber leh dawt sawi thiam ber tih hi an hriat vek tawh laia mahni dawtsawi thup nana Chief Minister Zoramthanga’n ‘thu chhumbung’ sawi thin anga mi dang a puh daih hi hriatthiam harsa an tih thu an sawi a. “Hetiang mi ram hruaitu kan nei hi a vanduaithlak rualin Congress party thawhlehna hmanrua atana MNF-in president atana Pu Zoramthanga an nei hi a lawmawm kan ti hle thung si a ni,” an ti.