Aizawl: DONER Ministry Parliamentary Consultative Committee nimina New Delhi-a thutkhawmah Lok Sabha MP C Lalrosanga’n Mizoram khawchhak lam leh chhim lama thlawhna tumhmun siam tura hma la turin sorkar laipui a ngen.
DONER Minister G Kishan Reddy hova thutkhawmah hian Lok Sabha MP chuan Mizoramin tumhmun pakhat a neih mek chu a tawk lo tih sawiin, tourism leh kawng danga hmasawnna atan Mizoram khawchhak leh chhimah tumhmun neih a tul thu a sawi a. Hemi kawnga hmathar la chak turin Civil Aviation Ministry thuneitute chu a ngen.
C. Lalrosanga chuan Mizoram chhim thlenga relkawng phah turin railways hotute a ngen a. Hma lo lak tawhte tharthawh leh turin railway board aiawhte chu a ngen.
Mizoram chhim leh khawchhak lamah zinmite tlawh duh tur hmun hrang hrang a awm thu C Lalrosanga chuan sawiin, thlawhna, rel leh lirthei hmanga kala tlawh tur hmun hlui leh mawi tak tak tlawhpawh leh tihchangtlun turte a awm thu a sawi a. Lawngtlai district-a Kolodyne luidungah lunghmun mawi leh hmuhnawm tak takte zinmite tana tlawh leh en theiha siam a nih theih dan turte sawiin, hmalakpuiah DONER Minstry hotute chu a sawm a. Mizoram khawchhak lama pipute sulhnu humhalh chunga zinmite tana tlawhpawh theih tura ruahmanna siam a rawt bawk.