Aizawl : Mizorama aurinna hmanga khawtlang hriattur pawimawh inhrilhna – public address system tichhuaktu hmasaa ngaih H Zakhawla’n tunkar Ningani tlai dar 5.10 khan chatuan ram a pan a, nimin khan Republic Veng, Aizawla an chenna-ah vui a ni.
Republic Veng YMA leh KTP hruaitu hlun, kum 85 mi H Zakhawla hian YMA hruaitu a nih lai, kum 1985 kumtir lamah Mizoram khawi hmunahmah an hman la hriat loh, tlangauna atana aurinna siam chu hruaitu dangte nen rawt chhuakin microphone, amplifier, loudspeaker (long horn) leh mamawh dangte an zawng khawm a, ni thum chhung vel buaipuiin an wire neihin a tlin ang tawkin an veng chhung hmun thumah mic horn an dah a, Amplifier 12 volts (Philips company siam) hmangin a khawlpui chu an in-ah an dah a, tlangau-ah a tang nghal a, khawtlang hriat tur pawimawh bakah Pathian thuchah te a sawi thin.
Thudawn danin hemi hnu hian Local administration department-in mic horn leh electric wire te chu Aizawl veng hrang hranga hman turin a sem ta a, veng hrang hrangin PA system chu an nei chho ve ta a ni.