QUARTER (Thenhranna, Famkim lo): In ngaihdam tawnna tel lo chuan hmangaihna nun kawng hi a famkim tak tak thei lo. Inngaihdam kawngah hian, “Tuntum chu ka ngaidam phawt ang che, ka ngaihdam vawi hnihna che a ni tawh” tihte hi kan hmang thin a, hei hi ngaihdamna a ni lova, thinrimna khawl khawm a ni zawk a sin. Ngaihdamna hi then hran theih a ni lova, ngaihdamna chanve pawh a awm thei hek lo. Kawppui leh hmangaih chu, ngaihdamna famkim, a sualna pawh hre leh tawh lo khawp ngaihdamna leh hmangaihna kan neih theih nan in zir nat sat a ngai hle.
RECEIVE (Dawng): Kawppui, ngaihzawngte thilpek kan dawn reng rengin, kan duh zawng a ni emaw, duh loh zawng a ni emaw, lawm thiam taka dawn a pawimawh em em a ni. Kan duh loh, ngainat loh zawng anih a vang a, “Lei ta vek vek a hetiang lei te chu” tih te, a petu rilru nawm lohna tur zawng tawngkam hmang lo tura kan fimkhur thiam hi a pawimawh em em a ni. Chutiang tawngkam mawi lo tak chuan, a thinlungah beidawnna a thlen thei a, thilpek manhla lo pawl taka a ngaih che phei chuan, a pe leh tawh miah lo ang che. Pakhat leh pakhat inkara thiltih inlawmpui thiam hi, hmangaihna kawng ti hlawhtlingtu a ni.
SHARE (Intawm): Kan inhmangaih tak tak a nih chuan, hlimnaah emaw, lawmnaah emaw, beidawnna ah emaw, lungngaihna ah emaw, zep miah lova, in hrilh tawn hi a pawimawh em em a ni. Kan hmangaihten a chhia emaw, a tha emaw, min hrilh hian, thinlung leh tih tak zet a ngaihthlak saka, lawmna thu a kan lawmpui thiama, lungngaihna thu a kan lungngaihpui a, kan thlamuan thiam hi a pawimawh em em a ni. A nuamah emaw, a hrehawmah emaw, lungngaihna leh lawmna intawm thiam zel hi hmangaihna kawnga, min thlamuantu kulhpui rinawm tak chu a ni.
TENDER (Duat, dim): Hmangaihna chuan duat takleh, dam diai a inenkawl hi a beiseiin, a phut reng thin a ni. Hmangaihna hi, duat tak leh dam diai a in enkawlna a awm loh chuan, hmangaihna kawng hlim awm a tling thei ngai lo.
UNDERSTAND (Inhriatthiam tawnna): Kawppui leh hmangaihte thiltih dan kan hriatthiam theih loh chuan, chu hmangaihna chu a rinhlelh awm rum rum thin a ni. Chuvangin, i thiltih leh i thil tum te chu i hmangaih hnenah chuan hriattir thin ang che. Chuan, kawppui leh ngaihzawngte thiltih kan hriatthiam pui theihnan, an dinhmuna indin tir a, thlir sak thiam hi a pawimawh em em bawk. Pakhat leh pakhat in hriatthiam tawnna kan neih chuan, hmangaihna kawng chu, khawvela hmanngaihna kawng hlimawm leh kawng ralmuang tak chu a ni ngei ang.