Aizawl : Home minister Lalchamliana’n nimin khan Directorate of Forensic Science Laboratory-ah e-Forensic a hawng.
Home Minister chuan kum 2018-ah Union Home Ministry-in Inter-operable criminal justice system (ICJS) a duang tih sawiin, he system-ah hian Police, Court, Prison leh Excise te thawhho vekna tur leh Court rorelna chak zawka kalpui leh thil tisualte pawh rang zawka hrem an nih theihna tura online system-a inchinfel zung zung theihna tur ruahman a nih thu a sawi.
e-Forensic system hmang tur te chuan rinawmna nena an hman a pawimawh dawn tih Home Minister chuan a sawi a. Tlangzarh tur chin thliar thiama, an dinhmun pawimawhna hre reng chunga an hman a ngai dawn tih sawiin, “India ram ah e-Forensic system ti hmasa theiah FSL an awm hi a chhuanawm hle,” a ti.
Home minister chuan, India ram Justice system-ah misuala puh chu evidence tha tak nen lo chuan thiamloh chantir an ni lo tih sawiin, evidence thenkhat court a thehluh a nih lawk thin loh avangin thuthlukna siam chhungin hun a duh rei phah thin tih a sawi a. e- Forensic system-ah courting chak zawk leh thuthlukna chak zawk a siam theih a rinawm thu a sawi.
e-Forensics system-ah hian FSL atanga expert report chhuak zawng zawng chu e-Forensics national portal-ah dah niin, case thawntu Police officer chauhin report chu a download theih tura siam a ni a. Mizoram Police leh Commissionerate of Excise & Narcotics hnuaia officer ten an hman theih tura e-forensic hi siam rih phawt a ni a, department dang FSL dawr thin te pawhin an hman ve thuai theih tura hmalak zel tum a nih thu sorkar thuchhuah chuan a tarlang.
Home Minister-in e-Forensics system a hawng rual hian Mizoram FSL annual report 2021 – 2022 a tlangzarh nghal bawk.
Directorate of Forensic Science Laboratory-ah hian Director H. Sangchungnunga hovin Forensic expert 15 an awm mek a, Mizoram chhung khawi hmunah pawh pawihkhawhna a thlenin Police-in an koh angin an kal zel a, case chi hrang hrang exam bakah expert testimony pein district hrang hrang court-ah an kal bawk a. Kumin January atanga August thleng khan case 756 leh exhibit 18886 an exam tawh a ni.