Afghan khawpui, Kabul-a tuition centre-a thihchilh bomb tihpuahah mi 19 vel an thi a, a tam zawk hi zirlai hmeichhia an nih thu police leh thil thleng hmututen an sawi.
Khawpui chhim lam, Dasht-e-Barchi-a Kaaj education centre-a bomb tihpuahah hian mi 30 velin hliam an tuar bawk.
Bomb tipuaktuin a tihpuah lai hi hi zirlaiten university exam atana an practice lai tak niin eng pawl mahin an tihah an la chhal lo.
Heng lai vela cheng tam zawk hi hnam tlem zawk, Hazara an ni a, tun hma lama Islamic State (IS) helhovin an lo beih fo thin tawhte an ni.
Tual chhung TV-in an tihchhuah leh a bul hnai damdawi in atanga lak video thehdarah chuan chhuatah ruang an tlar dul a. A hmun atanga chanchinbuten an tihchhuahah chuan mi mal enkawl college hi a chhe nasa hle tih a lang thei.
“He hmunah hian ka la hmu ve lo,” tiin hmeichhe pakhat chuan damdawi in hrang hrangah a farnu a zawn thu AFP news agency a hrilh a. “Kum 19 mi a ni,” a ti bawk.
Thil thleng hmutute chuan thi tam zawk hi hmeichhia an nih thu an sawi a. Zirlai hliam tur pakhat chuan beih an tawh lai hian mi 600 vel an awm khawm lai a nih thu AFP a hrilh bawk.
Taliban sorkara interior ministry thupuangtu chuan beihna thlenna hmunah hian venhim hna thawktu an awm tawh thu leh an dem thu a sawi.
Abdul Nafy Takor chuan civil mite beitute chu ‘mihring mihrinna hmelmatu leh nunphung pangngai an hriat lohzia’ tichiangtu a nih thu a sawi.
Zirna in beih a nih chu United Nations leh US pawhin an dem thu an sawi bawk.
“Zirlaite awm khawmnna pindan beih a ni hi a zahthlak a, zirlaite hian an zirnaah muanawm leh hlauhna tel lovin thil an ti tur a ni,” tiin Afghanistan-a UN palai, charge d’affaires Karen Decker chuan Twitter-ah a tar lang.