Aizawl: Myanmar tualchhung buaina avanga Mizorama raltlan zingah Kolasib district-a khawsa mek mi 221 an awm a, heng mite hi sorkar chuan raltlan an nih chhinchhiahna tur Identity card a siamsak vek tawh. Hetihrual hian raltlan ngah ber Khamrang khua chuan an khuaah raltlan luh belh an remti tawh lo thung.
Kolasib Bawrhsap pisa atanga thudawn danin, nimin thleng khan Kolasib district-a khaw hrang hrang 7-ah Myanmar atanga Mizorama raltlan, chhungte bel leh mi in luaha khawsa mi 221 an awm a; heng mite hi ID card siamsak vek tawh niin, Khamrang chu raltlan awm tamna ber khua a ni mek a, raltlan 163 an awm tawha chhinchhiah a ni.
Khamrang VCP Laithanga chuan an khuaah raltlan luh belh an remti tawh lo tih sawiin, sorkar atanga tanpuina hran dawn a awm loh avang leh raltlan an thathnem deuh tawh avangin eizawnna kawngah harsatna a awm theih dawn avangin an khuaah raltlan luh belh an remti tawh lo tih a sawi a. Luh belh tum chu an awm deuh reng niin a sawi bawk.
Khamranga khuaah hian Myanmar raltlan chhinchhiah chu 163 niin, mikhual anga khawsa mi pali/panga vel an awm bawk a; Chhungte bela khawsa chhungkaw 4 vel awmin, a bak zawng chuan mi in luah leh mi huanah chenna in sa hawhin an khawsa niin Khamrang khawtlang hruaitute chuan an sawi.
Raltlan te hnenah hian pawl leh kohhran atanga tanpuina an hmuh te an sem thin a, tunhnaia UN atanga Buhfai, Tel, Chana, Sahbawn, etc. an dawn erawh an la semchhuak hman lo thung.