Aizawl: Kum 2016-a Synod-in a pawm tawh, ‘Mizorama kohhran dangte nena inpumkhatna chungchangah hmalak ni rawh se’ tih bawhzuina kal zelah nimin khan Mizoram Synod puipate leh Lairam Isua Krista Baptist Kohhran puipate an inkawm.
LIKBK Assembly Committee Room-a inkawmhona hi Upa Zahranga, LIKBK Assembly Chairman-in a kaihruai a, Synod puipate chuan Synod thu pawm tawh chungchang sawi zauvin kohhran dang nena inpumkhatna neia rawngbawlho chu tun dinhmunah a pawimawh tak thu leh hemi atana Synod thu leh hla te an sawi.
Mizoram Presbyterian Kohhran leh LIKBK hian rawngbawlna kawng hrang hrangah thawhhona thuthlung an lo siam tawh a, tun tuma Synod puipaten Mizorama kohhran inpumkhatna tura hma an lakna chu LIKBK Assembly hruaitute chuan tha an tih thu leh an thlawp tlat thu te, a tul anga thawhpui an tum thu te an sawi a ni.
Ningani khan Synod puipate hian Lunglei Serkawna BCM hmunpuiah BCM puipate an kawm tawh bawk a. BCM puipate pawhin kohhran inpumkhatna atana thawhho tha an tih thu te, Synod hmalakna chu uluk taka an lo zirchian tur thute an sawi.
Kohhran inpumkhatna tura feh chhuak, Synod puipate hi Executive Secretary Rev. Dr. K. Lallawmzuala, Finance Officer Rev. PC. Pachhunga, Rev. Dr. Lalhmangaiha leh PressCom Manager Upa Ronghaka te an ni.